Buxoro davlat universitetida “Kibermadaniyatni yuksaltirish va kibergigiyenani shakllantirish” oyligi doirasida talaba-yoshlarning kiberxavfsizlik bo‘yicha bilim va ko‘nikmalarini oshirish, internet tarmog‘idan xavfsiz foydalanish madaniyatini shakllantirish maqsadida navbatdagi targ‘ibot tadbiri tashkil etildi.
Mazkur davra suhbati universitetning Xorijiy tillar fakulteti 3-bosqich talabalari ishtirokida o‘tkazilib, unda bugungi kunda keng tarqalgan kiberjinoyatlar, internet firibgarligi hamda shaxsiy ma’lumotlarni himoya qilish masalalariga alohida e’tibor qaratildi.
Uchrashuv davomida talabalarga noma’lum manbalardan yuborilayotgan fayllarni yuklab olmaslik, shubhali havolalarga kirmaslik, noma’lum telefon raqamlaridan bo‘layotgan qo‘ng‘iroqlarga ehtiyotkorlik bilan munosabatda bo‘lish hamda kiberfiribgarlarning turli aldov usullaridan ogoh bo‘lish yuzasidan tushuntirishlar berildi.
Shuningdek, shaxsiy bank plastik kartalarining rekvizitlari, SMS orqali yuboriladigan tasdiqlash kodlari, akkauntlarning login va parollari hamda boshqa maxfiy ma’lumotlarni begona shaxslarga oshkor qilmaslik muhimligi ta’kidlandi. Ayniqsa, ijtimoiy tarmoqlar va messenjerlar orqali tarqatilayotgan zararli havolalar hamda soxta xabarlardan ehtiyot bo‘lish bo‘yicha tavsiyalar berildi.
Davra suhbati yakunida talabalarga kundalik hayotda kibergigiyena qoidalariga qat’iy amal qilish, shaxsiy ma’lumotlar xavfsizligini ta’minlash va kibertahdidlarga nisbatan doimo hushyor bo‘lish zarurligi tushuntirildi.
Mazkur targ‘ibot tadbirlari talaba-yoshlar o‘rtasida kibermadaniyatni yuksaltirish, ularning raqamli savodxonligini oshirish hamda kiberjinoyatlarning oldini olishga qaratilgan.
#KibermadaniyatOyligi2026
EN