Buxoro davlat universitetida “Kibermadaniyatni yuksaltirish va kibergigiyenani shakllantirish” oyligi doirasida kechki ta’lim shaklida tahsil olayotgan talabalar ishtirokida kiberxavfsizlik va kibergigiyena masalalariga bag‘ishlangan davra suhbati tashkil etildi.
Mazkur davra suhbatida universitet Raqamli ta’lim texnologiyalari departamenti muhandis-dasturchisi R.N. Salimov ishtirok etib, talabalarga bugungi kunda kibermakonda uchrayotgan tahdidlar, internet va ijtimoiy tarmoqlardan xavfsiz foydalanish, shaxsiy ma’lumotlarni himoya qilish hamda kiberfiribgarlikning oldini olish masalalari yuzasidan tushunchalar berdi.
Tadbir davomida, ayniqsa, noma’lum manbalardan yuboriladigan shubhali havolalar, zararli APK fayllar, soxta xabarlar, bank kartalari ma’lumotlarini qo‘lga kiritishga qaratilgan firibgarlik usullari hamda ijtimoiy tarmoq akkauntlari xavfsizligini ta’minlash masalalariga alohida e’tibor qaratildi.
Shuningdek, talabalarga kuchli parollardan foydalanish, ikki bosqichli autentifikatsiyani yoqish, shaxsiy ma’lumotlarni begona shaxslarga oshkor qilmaslik va internetdagi shubhali takliflarga nisbatan ogoh bo‘lish bo‘yicha tavsiyalar berildi.
Davra suhbati davomida talabalarning kibermadaniyatini yuksaltirish, raqamli muhitda mas’uliyatli xatti-harakatlarni shakllantirish hamda kundalik hayotda kibergigiyena qoidalariga rioya etishning muhimligi ta’kidlandi.
Mazkur tadbir talabalarning kiberxavfsizlik sohasidagi bilimlarini mustahkamlash, kibertahdidlarga nisbatan ogohligini oshirish hamda xavfsiz raqamli muhitni shakllantirishga qaratildi.
#KibermadaniyatOyligi2026
EN