22.10.2026

2026-yil 22-oktyabr kuni Profilaktika kuni munosabati bilan Buxoro davlat universiteti Xorijiy tillar fakultetining 1-bosqich Filologiya va tillarni o‘qitish (nemis tili) ta’lim yo‘nalishi talabalari uchun “Kiberjinoyatlar profilaktikasi va APK fayllardan ogoh bo‘ling!” mavzusida targ‘ibot tadbiri tashkil etildi.

Tadbirda Buxoro viloyati Ichki ishlar boshqarmasi Kiberxavfsizlik boshqarmasi mas’ul xodimi ishtirok etib, talabalarga bugungi kunda keng tarqalib borayotgan kiberjinoyatlar, internet orqali sodir etiladigan firibgarliklar hamda zararli dasturlarning xavfi haqida ma’lumot berdi.

Tadbir davomida noma’lum manbalardan yuborilgan APK fayllarni yuklab olish va o‘rnatish oqibatida yuzaga kelishi mumkin bo‘lgan xavflar, shaxsiy ma’lumotlarning o‘g‘irlanishi, bank kartalari bilan bog‘liq firibgarliklar hamda foydalanuvchilarning akkauntlariga noqonuniy kirish holatlari xususida tushuntirishlar berildi.

Shuningdek, talabalarga shubhali havolalarga kirmaslik, noma’lum fayllarni ochmaslik, SMS orqali kelgan tasdiqlash kodlarini begonalarga bermaslik va shaxsiy ma’lumotlarni himoya qilish bo‘yicha tavsiyalar berildi.

Mazkur targ‘ibot tadbirining asosiy maqsadi talabalarning kiberxavfsizlik sohasidagi bilimlarini oshirish, internetdan xavfsiz foydalanish ko‘nikmalarini shakllantirish hamda kiberjinoyatlarning oldini olishga qaratilgan profilaktik ishlarni kuchaytirishdan iborat.

Buxoro davlat universitetida yoshlarning kibermadaniyatini yuksaltirish, ularni zamonaviy kiberxavflardan ogoh etish va axborot xavfsizligini ta’minlashga qaratilgan targ‘ibot tadbirlari davom ettiriladi.