10.04.2026

Xorijiy tillar fakultetida 1-bosqich magistratura talabalari ishtirokida “Akademik halollik va tadqiqot etikasi kodeksi” mavzusida davra suhbati tashkil etildi.

Tadbir davomida magistrlarga akademik halollik tamoyillari, ilmiy izlanishlarda tadqiqot etikasi qoidalariga rioya etishning ahamiyati hamda mazkur kodeksning mazmun-mohiyati batafsil tushuntirildi. Xususan, ilmiy ishlarni tayyorlash jarayonida plagiatdan tiyilish, manbalardan to‘g‘ri foydalanish, mualliflik huquqlarini hurmat qilish va ilmiy natijalarning haqqoniyligini ta’minlash kabi masalalarga alohida e’tibor qaratildi.

Shuningdek, suhbat jarayonida magistrlarga maishiy korrupsiya tushunchasi, uning jamiyat va ta’lim tizimiga salbiy ta’siri hamda bunday holatlarning oldini olishda har bir magistrning mas’uliyati haqida ham tushuntirishlar berildi.

Akademik halollik va tadqiqot etikasi – oʻqish va yozma ishlarni bajarishda (testlar, esselar, bitiruv malakaviy ishlari va dissertatsiyalar), oraliq va yakuniy nazoratlar, imtihonlarda savollarga javob berishda, tadqiqot olib borishda, oʻz bilimini ifoda etishda, pedagog xodimlar va boshqa xodimlar hamda talabalar bilan munosabatlarda halollikni ifoda etadigan qadriyatlari va tamoyillarining majmui. Bunda tadqiqotni amalga oshirish jarayonida maʼlumotlar, ilmiy natijalar, usullar, protseduralar va ilmiy nashrning holati haqqoniy va xolisona koʻrsatilishi, plagiat (koʻchirmachilik), mavjud maʼlumotlarni soxtalashtirish (falsifikatsiya) hamda qalbaki maʼlumotlarni yaratish (fabrikatsiya)ga yoʻl qoʻymaslik lozim. Akademik halollik va tadqiqot etikasi bu ta’lim va ilmiy faoliyat jarayonida halollik, adolat, mas’uliyat, shaffoflik va ishonch tamoyillariga qat’iy rioya qilishni anglatadi. Oddiy qilib aytganda, akademik halollik va tadqiqot etikasi: vazifalarni mustaqil bajarish, boshqalarning mehnatini hurmat qilish va koʻchirmachilikdan voz kechish demakdir.