09.07.2026

BuxDUda jismoniy tayyorgarlik darajasi sport sinovlarida yuqori natijalarga erishgan talabalar taqdirlandi

O‘zbekiston Respublikasi Prezidentining 2021-yil 16-iyundagi “Aholining jismoniy tayyorgarlik darajasini baholash tizimini joriy etishning tashkiliy chora-tadbirlari to‘g‘risida”gi PQ-5148-son qarori ijrosini ta’minlash maqsadida Buxoro davlat universiteti talaba-yoshlari o‘rtasida “Jismoniy tayyorgarlik darajasi” sport sinovlari o‘tkazildi.

Bugun universitetda mazkur sport sinovlarining maxsus va ixtiyoriy talablari bo‘yicha yuqori natijalarni qayd etgan talabalarni tantanali taqdirlash marosimi bo‘lib o‘tdi. Tadbirda universitetning Yoshlar masalalari va ma’naviy-ma’rifiy ishlar bo‘yicha birinchi prorektori Akmal Nazarov ishtirok etib, g‘oliblarni erishilgan natijalar bilan qutladi.

Taqdirlash marosimida sport sinovlarining maxsus talablari bo‘yicha g‘olib va sovrindor bo‘lgan talabalarga O‘zbekiston Respublikasi Sport vazirligi tomonidan ta’sis etilgan I, II va III darajali “Jismoniy tayyorgarlik darajasi” ko‘krak nishonlari, tegishli guvohnomalar hamda esdalik sovg‘alari topshirildi. Mazkur tizim yoshlar o‘rtasida sog‘lom turmush tarzini keng targ‘ib qilish hamda ularning jismoniy qobiliyatlarini muntazam rivojlantirib borishda muhim ahamiyat kasb etmoqda.