Sport bilan shug’ullanish nafaqat inson salomatligiga, balki uning ruhiy holatiga ham ijobiy ta’sir ko’rsatadi. Shijoat bilan ilm olish va o’qishga, shuningdek, hayotda optimist bo’lib yashashga o’rgatadi. Muntazam ravishda sport bilan shug’ullanish turli xil tushkunlik va depressiya holatlari yuzaga kelishini kamaytirish bilan bir qatorda yoshlarda o’ziga bo’lgan ishonch va qat’iyatlikni mustahkamlashda muhim rol o’ynaydi.Talabalarning sportga bo’lgan ishtiyoqini yanada qo’llab-quvvatlash maqsadida Ma’naviyat va ma’rifat bo’limi, Fakultetlararo Chet tillari kafedrasi o’qituvchilari N.N.Voxidova, M.H. Niyazova va Fakultetlararo Jismoniy madaniyat va sport kafedrasi o’qituvchilari A.K.Ibragimov,D.Ro’ziyev, B.Do’stov, R.Boymurodovlar “Sog’lom turmush – yorqin kelajak poydevori” shiori ostida sport musobaqasini tashkillashtirdilar. Talabalarni faollikka undovchi mazkur musobaqa 12- aprel 2017-yilda Buxoro davlat universitetining sport zalida bo’lib o’tdi. Turizm fakulteti 1-kurs talabalari orasidan tuzilgan “O’zbek qahramonlari” va “Everest” jamoalari o’rtasida musobaqa bo’lib o’tdi. Ular uch bosqichdan iborat bo’lgan sport musobaqasida bellashdilar. Birinchi bosqichda ular qanchalik kuchli va tezkor ekanliklarini namoyish etdilar. Ikkinchi bosqichda esa Angliyaning mashhur o’yinlaridan baseball va kriket o’yinlari qoidalarni tushuntirib ko’rsatib berishdi. Uchinchi bosqich savol-javob ko’rinishida bo’lib, bunda ularning sport va sport o’yinlari to’g’risidagi bilimlari baholandi. Ingliz va o’zbek tilida olib borilgan mazkur bosqichlar talabalarning xorijiy tillarni o’rganishdagi ishtiyoqini yanada oshirishga xizmat qiladi.G’olib bo’lgan “Everest” jamoasi Kamolot YIH tomonidan diplomlar va esdalik sovg’alari bilan taqdirlandilar. Musobaqa haqiqatda a’lo darajada tashkillashtirilgan ediki, talabalarni sport bilan muntazam ravishda shug’ullanish hamda xorijiy tillarni o’rganishga bo’lgan qiziqishini, shijoatini yanada oshiruvchi va undovchi kuch bo’lganligiga hech shubha yo’q!
