Yaqinda Indoneziyaning Jakarta va Palembang shahrida “kichik olimpiada” nomini olgan 18-Osiyo o‘yinlari bo‘lib o‘tdi. Osiyo o‘yinlarida O‘zbekiston sharafini 30 ta sport turi bo‘yicha 234 nafar sportchi himoya qildi. Musobaqa yakuniga ko‘ra sportchilarimiz jami 70 ta medalni qo‘lga kiritdilar. Shundan 21 ta oltin, 24 ta kumush, 25 ta bronza. Mamlakatimiz delegatsiyasi a’zolari medallar sifati bo‘yicha 45 ta davlat ichida umumjamoa hisobida 5-o‘rinni egalladilar. Eng quvonarlisi, o`zbek kurashining Osiyo o‘yinlaridan o`rin olganligidir. Ushbu sport turi bo‘yicha o‘tkazilgan 7 vazn toifasida jami 28 nafar kurashchi sovrindor bo‘ldi. O‘zbekiston ushbu musobaqaga 14 nafar polvon bilan ishtirok etib, 12 ta medalni qo‘lga kiritdi. Jami 7 ta oltin medalning 6 tasi o‘zbekistonliklarga tegishli ekanligi quvonarli holdir. Shuningdek, 6-13-oktabr kunlari bo‘lib o‘tgan uchinchi Paraosiyo o‘yinlarida ham mamlakatimiz sportchilari muvaffaqiyatli ishtirok etdilar. Jami 54 nafar sportchi bilan musobaqaga tashrif buyurgan O‘zbekiston terma jamoasi 77 ta, shundan 35 ta oltin, 24 ta kumush, 18 ta bronza medallarini qo‘lga kiritib, eng yaxshi natijani qayd etdi.Ana shunday nufuzli musoboqalarga mamlakatimiz terma jamoasi safida Buxoro davlat universiteti talabalari ham ishtirok etib, sovrindorlar safidan munosib o‘rin egallaganliklari barchani quvontirdi. Jismoniy madaniyat fakulteti talabalaridan DZYUDO sporti bo‘yicha Sherzod Namozov va Shirin Sharipov oltin, o‘zbek kurashi sporti bo‘yicha Ma’ruf G‘aybullayev oltin, yengil atletika sport turi bo‘yicha Muhammad Rixsimov bronza, DZYUDO sportidan Sharif Xalilov, SAMBO kurashidan Ahmad Rahmatullayevlar bronza medallarii bilan taqdirlandilar.- Albatta, bu sovrinlar o‘z-o‘zidan kelgani yo‘q. Buning ortida qanchadan-qancha tinimsiz mehnat, o‘z ustida ishlash, sabr va matonat yotadi, – deydi BuxDUning Jismoniy tarbiya fakulteti dekani Bahodir Ma`murov.Kuni kecha universitetda 18-Osiyo o‘yinlari g‘olibi bo‘lgan talabalarni taqdirlash marosimi bo‘lib o‘tdi. Buxoro davlat universiteti rektori A.To‘laganov g‘oliblarni qutlab, ularga qimmatbaho sovg‘alar topshirdi. BuxDU matbuot kotibiMannon Otaboy
