Telegram ijtimoiy tarmoqlarda “Биз Бухоро давлат университети 2-курс сиртқи бўлим талабалари номидан ёрдам сўраб мурожаат йўллаяпмиз” sarlavhasi ostida xabar joylashtirildi. Ushbu xabarga nisbatan Buxoro davlat universiteti Axborot xizmati quyidagilarni ma’lum qiladi.
BuxDU sirtqi ta`lim bo’limi Buxoro viloyati G’ijduvon tumani, Soktare MFYda joylashgan bo`lib, o’quv binoda belgilangan reja grafik asosida sirtqi ta`lim talabalari tahsil olishmoqda. O‘quv jarayonlarini samarali tashkil etish va laboratoriya hamda tajriba sinovlarini joyida amalga oshirish bo‘yicha o’quv binosida barcha sharoitlar yaratilgan. Auditoriyalar to’liq raqamlashtirilgan bo`lib, zamonaviy texnologiya vositalari bilan jihozlangan hamda ta`lim sifatini nazorat qilish uchun zamonaviy kameralar o’rnatilgan.
O’quv binosida shuningdek, talabalar bo’sh vaqtlarida sport turlari bilan shug`ullanishlari uchun sport zal tayyor holga keltirilgan bo`lib, kerakli texnik jihozlar bilan ta`minlangan. Shuningdek, doimiy tarzda Buxoro shahrining avtoshohbekatidan BuxDU o'quv binosi tomon muntazam avtobus va yengil avtomobillar qatnovi yo'lga qo'yilgan. Talabalarning bo`sh vaqtini sifatli tashkil etish maqsadida doimiy tarzda ushbu o’quv binosida turli madaniy tadbirlar uyushtirilib kelinmoqda. Shuningdek, talabalar uchun qo’shimcha qulaylik yaratish maqsadida o’quv binoga yaqin joyda 400 o’rinli talabalar turar joyi qad rostladi, xozirda u yerda boshqa viloyatlardan, uzoq tumanlardan kelgan talabalar joylashishgan.
Maqolada keltirilgan fikrlar tasdiqlanmagan va asossiz hisoblanadi. Shunga qaramay, universitet rahbariyati har qanday tanqidiy fikrni eshitishga va konstruktiv takliflar asosida tizimni rivojlantirib borishga tayyorligini bildiradi. Universitetning ta’lim tizimini yanada takomillashtirish yo‘lida ochiqlik va javobgarlik tamoyillariga sodiq qolamiz.
Buxoro davlat universiteti Axborot xizmati
