O‘zbekiston Respublikasining 2024 yil 7 sentyabrdagi “Ma’muriy islohotlar doirasida ta’lim sohasida davlat boshqaruvi takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi O‘RQ-957-son Qonuni bilan bir qator qonun hujjatlariga Oliy ta’lim, fan va innovatsiyalar vazirligining, Maktabgacha va maktab ta’limi vazirligining, Sport vazirligining, Kambag‘allikni qisqartirish va bandlik vazirligining nomlanishi va vakolatlari, shuningdek Ilm-fanni moliyalashtirish va innovatsiyalarni qo‘llab-quvvatlash jamg‘armasining nomlanishi aniqlashtirilishini nazarda tutuvchi o‘zgartirishlar kiritildi.
Shuningdek, “Ta’lim to‘g‘risida”gi Qonunga o‘rta maxsus, professional, oliy ta’limni hamda oliy ta’limdan keyingi ta’limni amalga oshiruvchi davlat va nodavlat ta’lim tashkilotlarini tashqi baholashning yangi tizimi joriy etilishini, kadrlarning malakasini oshirish hamda ularni qayta tayyorlashni nazarda tutuvchi o‘zgartirishlar kiritildi.
Bundan tashqari, nodavlat ta’lim xizmatlarini ko‘rsatish sohasidagi faoliyatni lisenziyalash bo‘yicha vakolatlar Oliy ta’lim, fan va innovatsiyalar vazirligi hamda Maktabgacha va maktab ta’limi vazirligi o‘rtasida taqsimlanishi belgilandi.
Shu bilan birga, O‘zbekiston Respublikasining 1992 yil 14 yanvarda qabul qilingan “Jismoniy tarbiya va sport to‘g‘risida”gi 513-XII-sonli Qonuniga o‘zgartirish kiritilib, O‘zbekiston Respublikasi Oliy ta’lim, fan va innovatsiyalar hamda O‘zbekiston Respublikasi Maktabgacha va maktab ta’limi vazirliklarining jismoniy tarbiya va sport sohasidagi vakolatlari belgilandi.
BuxDU Yuridik bo‘lim
yuriskonsulti B.Raxmanov
