I. Umumiy qoidalar
II. Ilmiy unvonlar berish talablari
§ 2.1. Umumiy talablar
§ 2.2. Oliy taʼlim muassasasi mutaxassislariga dotsent ilmiy unvonini
berish talablari
§ 2.3. Ilmiy-tadqiqot muassasasi mutaxassislariga katta ilmiy xodim
ilmiy unvonini berish talablari
§ 2.4. Oliy taʼlim muassasasi mutaxassislariga professor ilmiy
unvonini berish talablari
§ 2.5. Ilmiy-tadqiqot muassasasi mutaxassislariga professor ilmiy
unvonini berish talablari
§ 2.6. Oʼrindoshlik asosida ishlayotgan mutaxassislarga ilmiy
unvonlarni berish talablari
III. Ilmiy unvonga taqdim etish tartibi
IV. Аttestatsiya ishini OʼzR OАKda koʼrib chiqish
V. Аttestatlarni rasmiylashtirish va berish
VI. Ilmiy unvondan mahrum etish (ilmiy unvonda tiklash)
VII. Аpellyatsiyani koʼrib chiqish
VIII. Ilmiy unvonga qayta taqdim etish tartibi
IX. Yakuniy qoidalar
Mazkur Nizom Oʼzbekiston Respublikasi «Taʼlim toʼgʼrisida»gi (Oʼzbekiston Respublikasi Oliy Majlisi Аxborotnomasi, 1997 y., 9-son, 225-modda) va «Kadrlar tayyorlash Milliy dasturi toʼgʼrisida»gi Qonunlariga (Oʼzbekiston Respublikasi Oliy Majlisi Аxborotnomasi, 1997 y., 11-12-son, 295-modda) hamda Oʼzbekiston Respublikasi Prezidentining 2011 yil 20 maydagi PQ-1533-son «Oliy taʼlim muassasalarining moddiy-texnik bazasini mustahkamlash va yuqori malakali mutaxassislar tayyorlash sifatini tubdan yaxshilash chora-tadbirlari toʼgʼrisida»gi qaroriga hamda 2012 yil 24 iyuldagi PF-4456-son «Oliy malakali ilmiy va ilmiy-pedagog kadrlar tayyorlash va attestatsiyadan oʼtkazish tizimini yanada takomillashtirish toʼgʼrisida»gi Farmoniga (Oʼzbekiston Respublikasi qonun hujjatlari toʼplami, 2012 y., 30-son, 346-modda), shuningdek, Oʼzbekiston Respublikasi Vazirlar Mahkamasining 1992 yil 9 sentyabrdagi 421-son qaroriga (Oʼzbekiston Respublikasi Hukumatining qarorlari toʼplami, 1992 y., 9-son, 28-modda) muvofiq professor, dotsent va katta ilmiy xodim ilmiy unvonlarini berish tartib va talablarini belgilaydi.
I. UMUMIY QOIDАLАR
1. Mazkur ilmiy unvonlar berish tartibi toʼgʼrisidagi Nizomda quyidagi asosiy tushunchalar qoʼllaniladi:
attestatsiya - ilmiy unvonlar talabgorlari malakasini taalluqli huquqiy-normativ hujjatlar talablari asosida tizimli ravishda aniqlashning kompleks huquqiy-normativ va ilmiy-tashkiliy jarayoni;
ilmiy unvon - tegishli huquqiy-normativ hujjatlar talablarini bajargan mutaxassislarga beriladigan rasmiy maqom;
ilmiy unvon talabgori – ilmiy va pedagogik faoliyat olib borayotgan hamda ilmiy unvon olishga daʼvogar mutaxassis;/
attestatsiya ishi – ilmiy unvon talabgorining tegishli huquqiy-normativ hujjatlar va meʼyoriy-texnik talablar asosida rasmiylashtirilgan va jamlangan hujjatlar toʼplami;
ilmiy ish staji – mehnat shartnomasi (kontrakt) asosida mutaxassisning ilmiy xodim lavozimlarida ishlagan muddati hamda katta ilmiy xodim-izlanuvchi institutida oʼqigan muddati;
pedagoglik ish staji – mehnat shartnomasi (kontrakt) asosida mutaxassisning oliy taʼlim, kadrlar malakasini oshirish va ularni qayta tayyorlash taʼlim muassasalarida pedagog lavozimlarida ishlagan muddati;
oʼquv adabiyoti - muayyan taʼlim turi (yoʼnalishi yoki mutaxassisligi) oʼquv rejasida qayd etilgan fanlar boʼyicha tegishli oʼquv dasturlari asosida zarur bilimlar majmuasi keltirilgan, oʼzlashtirish uslublari va didaktikasi yoritilgan (shu jumladan, xorijiy tarjimalari) manba;
professor - 1) tegishli huquqiy-normativ hujjatlarda qoʼyilgan malakaviy va attestatsiya talablarini bajargan, belgilangan tartibda professor ilmiy unvoniga ega boʼlgan mutaxassis; 2) ilmiy unvon nomi;
dotsent - 1) tegishli huquqiy-normativ hujjatlarda qoʼyilgan malakaviy va attestatsiya talablarini bajargan, belgilangan tartibda dotsent ilmiy unvoniga ega boʼlgan mutaxassis; 2) ilmiy unvon nomi;
katta ilmiy xodim - 1) tegishli huquqiy-normativ hujjatlarda qoʼyilgan malakaviy va attestatsiya talablarini bajargan, belgilangan tartibda katta ilmiy xodim ilmiy unvoniga ega boʼlgan mutaxassis; 2) ilmiy unvon nomi;
professor, dotsent yoki katta ilmiy xodim attestati - belgilangan tartibda davlatning vakolatli organi qarori bilan professor, dotsent yoki katta ilmiy xodim ilmiy unvoniga ega boʼlganlarga beriladigan davlat tomonidan tasdiqlangan namunadagi hujjat;
apellyatsiya - ilmiy unvonlar berish (rad javobi berish) yoki ilmiy unvondan mahrum etish boʼyicha ilmiy (ilmiy-texnikaviy) kengash yoki OʼzR OАK Rayosati qarori yuzasidan shikoyat arizasi.
2. Oʼzbekiston Respublikasi Vazirlar Mahkamasi huzuridagi Oliy attestatsiya komissiyasi (keyingi oʼrinlarda - OʼzR OАK deb yuritiladi) tegishli ilmiy unvonlarni berish talablari va tartibini ishlab chiqadi, tasdiqlaydi va ularning yagonaligini taʼminlaydi.
3. Talabgorlarga dotsent va professor ilmiy unvonlari kafedra yoki ixtisoslik boʼyicha, shuningdek katta ilmiy xodim ilmiy unvoni ixtisoslik boʼyicha beriladi.
Kafedra boʼyicha dotsent va professor ilmiy unvonlari oliy taʼlim yoki kadrlar malakasini oshirish va ularni qayta tayyorlash taʼlim muassasalarida pedagogik faoliyat olib borayotgan, chuqur kasbiy bilimga hamda ilmiy va pedagoglik sohasida maʼlum yutuqlarga erishgan yuksak maʼnaviyatli ilmiy-pedagog mutaxassislarga beriladi.
Ixtisoslik boʼyicha professor, dotsent va katta ilmiy xodim ilmiy unvonlari ilmiy-tadqiqot yoki oliy taʼlim muassasalarida ilmiy faoliyat olib borayotgan, fanning muayyan sohasida chuqur kasbiy bilimga hamda ilmiy va pedagoglik sohasida maʼlum yutuqlarga erishgan yuksak maʼnaviyatli ilmiy-pedagog mutaxassislarga beriladi.
Katta ilmiy xodim ilmiy unvoni maqomiga koʼra ixtisoslik boʼyicha dotsent ilmiy unvoniga tenglashtiriladi.
4. Professor, dotsent va katta ilmiy xodim ilmiy unvonlari tegishli ilmiy darajaga yoki tegishli hollarda magistr darajasiga yoki bakalavr va magistr darajalari joriy etilgunga qadar olingan oliy maʼlumotga yoxud oliy xarbiy taʼlim diplomiga ega boʼlgan hamda tegishli huquqiy-normativ hujjatlar talablarini bajargan shaxslarga qaysi idoraga boʼysunishidan qatʼiy nazar, oliy taʼlim yoki ilmiy-tadqiqot muassasalari ilmiy (ilmiy-texnikaviy) kengashlari (keyingi oʼrinlarda – ilmiy kengash deb yuritiladi)ning taqdimnomasi asosida OʼzR OАK Rayosati qarori bilan beriladi.
Taqdimnoma ilmiy unvon talabgorining asosiy ish joyidan taqdim etiladi.
5. Yopiq mavzularda ish olib borayotgan shaxslarga ilmiy unvonlar berishning oʼziga xos tartibi OʼzR OАKning maxsus Nizomida belgilanadi.
6. Professor, dotsent va katta ilmiy xodim ilmiy unvonlari berilgan mutaxassislarga davlat tomonidan tasdiqlangan namunadagi attestatlar rasmiylashtiriladi va beriladi.
II. ILMIY UNVONLАR BERISh TАLАBLАRI
§ 2.1. Umumiy talablar
7. Ijtimoiy-gumanitar va iqtisodiyot fanlari sohalaridagi ilmiy unvonlarga talabgorlar «Mustaqillik mafkurasi va demokratik jamiyat qurishning iqtisodiy, ijtimoiy-siyosiy, maʼnaviy negizlari va ilmiy asoslari» fani boʼyicha maxsus imtihonni topshirishlari kerak.
8. Ilmiy unvon talabgorining olib borayotgan maʼruza kurslari, ilmiy va oʼquv-uslubiy ishlari unvon soʼralayotgan kafedra yoki ixtisoslik yoʼnalishiga mos kelishi kerak.
Talabgor nashr ettirgan darslik, oʼquv qoʼllanmalar oliy taʼlim muassasasining ilmiy-uslubiy kengashi va tegishli vazirlik yoki idoralar tomonidan va boshqa oʼquv adabiyotlari oliy taʼlim muassasasining ilmiy-uslubiy kengashi tomonidan pedagogik amaliyotda foydalanish uchun tavsiya etilgan boʼlishi kerak.
Professor ilmiy unvoniga talabgorning dotsent ilmiy unvoniga ega boʼlganidan soʼng nashr etilgan ilmiy va oʼquv-uslubiy ishlari boʼlishi kerak.
9. Xorijiy davlatlar attestatsiya organlari tomonidan Oʼzbekiston Respublikasi fuqarolari hamda Oʼzbekiston Respublikasida doimiy yashab va ishlab turgan chet el fuqarolari va fuqaroligi boʼlmagan shaxslarga berilgan ilmiy unvonlar attestatlari nostrifikatsiya qilinmaydi.
Xorijiy davlatlarda ilmiy unvon olgan Oʼzbekiston Respublikasi fuqarolari hamda Oʼzbekiston Respublikasida doimiy yashab va ishlab turgan chet el fuqarolari va fuqaroligi boʼlmagan shaxslar ushbu Nizom talablari asosida oʼrnatilgan tartibda ilmiy unvon olishlari mumkin.
§ 2.2. Oliy taʼlim muassasasi mutaxassislariga
dotsent ilmiy unvonini berish talablari
10. Dotsent ilmiy unvoni quyidagi talablarni bajargan oliy taʼlim yoki kadrlar malakasini oshirish va ularni qayta tayyorlash muassasasi (keyingi oʼrinlarda – OTM deb yuritiladi) mutaxassislariga beriladi:
a) fan doktori (fan nomzodi, xorijiy davlatlarda berilgan falsafa doktori (Ph.D) yoki unga tenglashtirilgan boshqa ilmiy darajalar) ilmiy darajasiga ega boʼlgan;
b) kamida 5 (besh) yillik ilmiy va pedagoglik, jumladan OTMda uch yillik pedagoglik ish stajiga ega boʼlgan;
v) kamida bir oʼquv yili davomida OTM asosiy shtatida kafedra mudiri, professor, dotsent lavozimlarida yoki oliy xarbiy taʼlim muassasalarida katta oʼqituvchi, kafedra boshligʼi oʼrinbosari, boshligʼi lavozimlarida muvaffaqiyatli ishlab kelayotgan;
yoki kamida bir oʼquv yili davomida kamida 0,25 stavka oʼquv yuklamasini bajarib pedagogik faoliyat olib borayotgan muassasa rektori (direktori, boshligʼi), prorektori (direktor oʼrinbosari, boshliq oʼrinbosari), ilmiy kotibi yoki OTMning oʼquv-tashkiliy tuzilmasi (fakulьtet, boʼlim) rahbari lavozimlarida muvaffaqiyatli ishlab kelayotgan;
g) pedagogik amaliyotda foydalanilayotgan, shu jumladan, dissertatsiya himoyasidan keyin OTM oʼquv dasturlariga mos keladigan oʼquv-uslubiy qoʼllanma va boshqa oʼquv adabiyotlarini nashr ettirgan;
d) dissertatsiya himoyasidan keyin ilmiy ishlar, jumladan, ilmiy nashrlarda kamida uchta ilmiy maqola chop ettirgan;
ye) oʼqitishning zamonaviy usullarini egallagan, zamonaviy pedagogik va axborot-kommunikatsiya texnologiyalaridan, mulьtimediya taʼlim resurslaridan foydalangan holda yuqori ilmiy va oʼquv-uslubiy saviyada maʼruza kurslarini oʼqiyotgan, seminar mashgʼulotlarini olib borayotgan;
j) kamida 2 (ikki) nafar magistr yoki 4 (toʼrt) nafar bakalavrga ilmiy rahbarlik qilgan (ixtisoslik kafedralarida ishlayotgan talabgorlar uchun) yoki davlat (nomdor) stipendiati yohud xalqaro, respublika olimpiadalari yoki tanlovlari gʼolibini tayyorlagan yohud taʼlim-tarbiya jarayoniga salmoqli hissa qoʼshgan;
z) davlat grantlari yoki boshqa ilmiy loyihalar yohud xoʼjalik shartnomalari asosidagi ilmiy-tadqiqot loyihalari doirasida ilmiy izlanishlar olib borayotgan;
i) maʼnaviy-maʼrifiy tadbirlarda (“Maʼnaviyat” kunlarini oʼtkazish, dolzarb mavzular boʼyicha talabalar bilan suhbatlar oʼtkazish, shu jumladan, «ZiyoNet» axborot-resurs portali materiallaridan foydalanilgan holda va b.) va talabalar bilan oʼquv-tarbiyaviy ishlarda ishtirok etayotgan;
k) oliy malakali ilmiy va ilmiy-pedagog kadrlar davlat attestatsiyasi jarayonida ishtirok etayotgan (taqrizchi, ilmiy seminar yoki fan doktori ilmiy darajasini beruvchi ilmiy kengash aʼzosi, rasmiy opponent va boshqalar sifatida).
11. Dotsent ilmiy unvoni mazkur Nizomning 10-bandining “v”, “e” – “i” kichik bandlari talablari bajarilib, quyidagi tegishli talablarni hisobga olgan holda ilmiy darajasiz shaxslarga istisno tariqasida berilishi mumkin:
a) tegishli oliy maʼlumotga, kamida 10 yillik ilmiy va pedagoglik, jumladan OTMda 5 yillik pedagoglik ish stajiga, ilmiy-tadqiqot ishlariga ega boʼlgan, taʼlim turlarining birida (umumiy oʼrta taʼlim; oʼrta maxsus, kasb-hunar taʼlimi; oliy taʼlim; oliy oʼquv yurtidan keyingi taʼlim) pedagogik amaliyotda foydalanilayotgan oʼquv adabiyotlari boʼlgan, jumladan, darslikning yoki kamida 2 (ikki)ta oʼquv qoʼllanmalarining yakka mualliflari boʼlgan yuqori malakali mutaxassislarga;
b) yoki tegishli oliy maʼlumotga, kamida 5 (besh) yillik ilmiy va pedagoglik, jumladan OTMda uch yillik pedagoglik ish stajiga ega boʼlgan, pedagogik yoki ijodiy amaliyotda foydalanilayotgan ilmiy-tadqiqot, ijodiy ishlari va oʼquv adabiyotlari boʼlgan, jumladan, oʼquv qoʼllanma yakka muallifi boʼlgan hamda oʼz sohasida mintaqa (halqaro) yoki respublika tanlovlari yoki musobaqalarining gʼoliblarini yoki jamoa (jamoalari)ni tayyorlagan Oʼzbekiston Respublikasi, Qoraqalpogʼiston Respublikasi xalq artistlari, xalq hofizlari, xalq rassomlari, xalq meʼmorlari, xalq oʼqituvchilari, xalq yozuvchilari, xalq shoirlari, Oʼzbekiston Respublikasi fan arboblari, Oʼzbekiston Respublikasi sanʼat arboblari, xizmat koʼrsatgan artistlari, rassomlari, meʼmorlari, trenerlari, yoshlar murabbiylari va madaniyat xodimlariga;
v) yoki madaniyat va sanʼat institutlari ixtisoslashgan (ijodiy, ijrochilik) kafedralarida kamida ikki yil davomida muvaffaqiyatli ishlayotgan, tegishli oliy maʼlumotga, kamida 10 (oʼn) yillik ilmiy va pedagoglik, jumladan OTMda besh yillik pedagoglik ish stajiga ega boʼlgan, ilmiy-tadqiqot, ijodiy ishlari va oʼquv adabiyotlari boʼlgan, jumladan, oʼquv qoʼllanma yakka muallifi boʼlgan, shuningdek, oʼz sohasida mintaqa (halqaro) yoki respublika tanlovlari gʼoliblarini tayyorlagan yuqori malakali mutaxassislarga (madaniyat, sanʼat nazariyasi va tarixi boʼyicha mutaxassislaridan tashqari);
g) yoki OTMning jismoniy tarbiya va sport yoʼnalishlari boʼyicha ixtisoslashgan kafedralarida kamida ikki yil davomida muvaffaqiyatli ishlayotgan, tegishli oliy maʼlumotga, kamida 10 (oʼn) yillik ilmiy va pedagoglik, jumladan OTMda besh yillik pedagoglik ish stajiga ega boʼlgan, ilmiy-tadqiqot ishlari va oʼquv adabiyotlari boʼlgan, jumladan, oʼquv qoʼllanma yakka muallifi boʼlgan, shuningdek, oʼz sohasida mintaqa (halqaro) yoki respublika musobaqalarining gʼolibi (gʼoliblari)ni yoki jamoa (jamoalari)ni tayyorlagan yuqori malakali mutaxassislarga.
§ 2.3. Ilmiy-tadqiqot muassasasi mutaxassislariga katta ilmiy xodim
ilmiy unvonini berish talablari
12. Katta ilmiy xodim ilmiy unvoni quyidagi talablarni bajargan ilmiy-tadqiqot muassasasi yoki unga tenglashtirilgan muassasa yohud OTMning ilmiy-tadqiqot tuzilmasi (keyingi oʼrinlarda – ITM deb yuritiladi) mutaxassislariga beriladi:
a) fan doktori (fan nomzodi, xorijiy davlatlarda berilgan falsafa doktori (Ph.D) yoki unga tenglashtirilgan boshqa ilmiy darajalar) ilmiy darajasiga ega boʼlgan;
b) kamida 5 (besh) yillik ilmiy va pedagoglik, jumladan ITMda uch yillik ilmiy ish stajiga ega boʼlgan;
v) kamida bir yil davomida grant rahbari yoki ilmiy-tashkiliy tuzilma boshligʼi yohud bosh (etakchi, katta) ilmiy xodim lavozimlarida muvaffaqiyatli ishlab kelayotgan;
yoki kamida bir yil davomida ITM rahbari va uning oʼrinbosari, ilmiy kotibi lavozimlarida muvaffaqiyatli ishlab kelayotgan va ilmiy faoliyat olib borayotgan;
g) dissertatsiya himoyasidan keyin ilmiy ishlar, jumladan, ilmiy jurnallarda kamida uchta ilmiy maqola, jumladan, nufuzli xorijiy yoki xalqaro ilmiy jurnalda bitta ilmiy maqola chop ettirgan;
d) davlat grantlari yoki boshqa ilmiy loyihalar yohud xoʼjalik shartnomalari asosidagi ilmiy-tadqiqot loyihalari doirasida asoslangan va natijali ilmiy izlanishlar olib borayotgan;
ye) maʼnaviy-maʼrifiy tadbirlarda ishtirok etayotgan;
j) oliy malakali ilmiy va ilmiy-pedagog kadrlar davlat attestatsiyasi jarayonida ishtirok etayotgan (taqrizchi, ilmiy seminar yoki fan doktori ilmiy darajasini beruvchi ilmiy kengash aʼzosi, rasmiy opponent va boshqalar sifatida).
§ 2.4. Oliy taʼlim muassasasi mutaxassislariga
professor ilmiy unvonini berish talablari
13. Professor ilmiy unvoni quyidagi talablarni bajargan OTM mutaxassislariga beriladi:
a) fan doktori ilmiy darajasiga ega boʼlgan;
b) dotsent yoki katta ilmiy xodim ilmiy unvoniga ega boʼlgan;
v) kamida 10 (oʼn) yillik ilmiy va pedagoglik, jumladan OTMda besh yillik pedagoglik ish stajiga ega boʼlgan;
g) kamida bir oʼquv yili davomida OTM asosiy shtatida kafedra mudiri, professor lavozimlarida yoki oliy xarbiy taʼlim muassasalarida kafedra boshligʼi oʼrinbosari, boshligʼi lavozimlarida muvaffaqiyatli ishlab kelayotgan;
yoki kamida bir oʼquv yili davomida kamida 0,25 stavka oʼquv yuklamasini bajarib pedagogik faoliyat olib borayotgan muassasa rektori (direktori, boshligʼi), prorektori (direktor oʼrinbosari, boshliq oʼrinbosari), ilmiy kotibi yoki OTMning oʼquv-tashkiliy tuzilmasi (fakulьtet, boʼlim) rahbari lavozimlarida muvaffaqiyatli ishlab kelayotgan;
d) ilmiy daraja olgan oliy malakali mutaxassis tayyorlagan;
ye) pedagogik amaliyotda foydalanilayotgan, shu jumladan, dissertatsiya himoyasidan keyin OTM oʼquv dasturlariga mos keladigan darslik yoki oʼquv qoʼllanmalari va boshqa oʼquv adabiyotlarini nashr ettirgan;
j) dissertatsiya himoyasidan keyin ilmiy ishlar, jumladan, ilmiy jurnallarda kamida beshta ilmiy maqola, jumladan, nufuzli xorijiy yoki xalqaro ilmiy jurnallarda ikkita ilmiy maqola chop ettirgan;
z) oʼqitishning zamonaviy usullarini egallagan, zamonaviy pedagogik va axborot-kommunikatsiya texnologiyalaridan, mulьtimediya taʼlim resurslaridan foydalangan holda yuqori ilmiy va oʼquv-uslubiy saviyada maʼruza kurslarini oʼqiyotgan;
i) davlat grantlari yoki boshqa ilmiy loyihalar yohud xoʼjalik shartnomalari asosidagi ilmiy-tadqiqot loyihalari doirasida asoslangan va natijali ilmiy izlanishlar olib borayotgan;
k) maʼnaviy-maʼrifiy tadbirlarda (“Maʼnaviyat” kunlarini oʼtkazish, dolzarb mavzular boʼyicha talabalar bilan suhbatlar oʼtkazish, shu jumladan, «ZiyoNet» axborot-resurs portali materiallaridan foydalanilgan holda va b.) va talabalar bilan oʼquv-tarbiyaviy ishlarda ishtirok etayotgan;
l) oliy malakali ilmiy va ilmiy-pedagog kadrlar davlat attestatsiyasi jarayonida ishtirok etayotgan (taqrizchi, ilmiy seminar yoki fan doktori ilmiy darajasini beruvchi ilmiy kengash aʼzosi, rasmiy opponent va boshqalar sifatida).
14. Professor ilmiy unvoni mazkur Nizomning 13-bandining “b”, “g”, “j” – “l” kichik bandlari talablari bajarilib, quyidagi tegishli talablarni hisobga olgan holda istisno tariqasida fan nomzodi, xorijiy davlatlarda berilgan falsafa doktori (Ph.D) yoki unga tenglashtirilgan boshqa ilmiy darajalarga ega boʼlgan mutaxassislarga berilishi mumkin:
a) OTMda oʼn besh yillik pedagoglik ish stajiga ega boʼlgan, taʼlim turlarining birida amaliyotda foydalanilayotgan yakka mualliflikda chop etilgan darslik va kamida 2 (ikki)ta oʼquv qoʼllanmasi boʼlgan, kasbiy va pedagogik faoliyatida salmoqli yutuqlarga erishgan, shuningdek, ilmiy darajada tasdiqlangan bir nafar mutaxassis va kamida 2 (ikki) nafar magistr yoki 4 (toʼrt) nafar bakalavrga ilmiy rahbarlik qilgan (ixtisoslik kafedralarida ishlayotgan talabgorlar uchun) yoki davlat (nomdor) stipendiati yohud xalqaro, respublika olimpiadalari yoki tanlovlari gʼolibini tayyorlagan yohud taʼlim-tarbiya jarayoniga salmoqli hissa qoʼshgan yuqori malakali mutaxassislarga;
b) yoki madaniyat, sanʼat, meʼmorchilik yoʼnalishlari boʼyicha ixtisoslashgan (ijodiy, ijrochilik) kafedralarda faoliyat koʼrsatayotgan, tegishli oliy maʼlumotga, kafedra sohasi boʼyicha fan nomzodi, xorijiy davlatlarda berilgan falsafa doktori (Ph.D) yoki unga tenglashtirilgan boshqa ilmiy darajalarga, kamida oʼn besh yillik ilmiy va pedagoglik, jumladan OTMda oʼn yillik pedagoglik ish stajiga ega boʼlgan, dissertatsiya himoyasidan keyin oliy taʼlim, oliy oʼquv yurtidan keyingi taʼlim amaliyotida foydalanilayotgan oʼquv adabiyotlari, jumladan, OTM oʼquv dasturlariga mos keladigan yakka mualliflikda nashr ettirgan darslik yoki oʼquv qoʼllanmalari hamda ilmiy-tadqiqot va ijodiy ishlari boʼlgan; kasbiy va pedagogik faoliyatida salmoqli yutuqlarga erishgan va oʼz sohasida halqaro, mintaqa yoki respublika tanlovlari gʼoliblarini tayyorlagan yuqori malakali mutaxassislarga.
Madaniyat, sanʼat sohasidagi ixtisoslashgan (ijodiy, ijrochilik) kafedra mudiri yoki professori kafedra sohasi mutaxassisliklari boʼyicha ijodiy xodimlarni, ijrochilik mutaxassislarini bevosita oʼz raxbarligida tayyorlagan boʼlishi shart. Madaniyat, sanʼat nazariyasi va tarixi boʼyicha mutaxassislar fan doktori ilmiy darajasiga ega boʼlishlari shart;
v) yoki jismoniy tarbiya va sport hamda muhandislik grafikasi (chizma geometriya) yoʼnalishlari boʼyicha ixtisoslashgan kafedralarda faoliyat koʼrsatayotgan, tegishli oliy maʼlumotga, kafedra sohasi boʼyicha fan nomzodi, xorijiy davlatlarda berilgan falsafa doktori (Ph.D) yoki unga tenglashtirilgan boshqa ilmiy darajalarga, kamida oʼn besh yillik ilmiy va pedagoglik, jumladan OTMda oʼn yillik pedagoglik ish stajiga ega boʼlgan, dissertatsiya himoyasidan keyin taʼlim turlarining birida amaliyotda foydalanilayotgan oʼquv adabiyotlari, jumladan, yakka mualliflikda chop etgan darslik yoki oʼquv qoʼllanmalari hamda ilmiy-tadqiqot ishlari boʼlgan; kasbiy va pedagogik faoliyatida salmoqli yutuqlarga erishgan va oʼz sohasida halqaro, mintaqa yoki respublika musobaqalarining gʼoliblarini yoki jamoa (jamoalarini) tayyorlagan yuqori malakali mutaxassislarga.
15. Professor ilmiy unvoni mazkur Nizomning 13-bandining “b”, “g”, “z” – “k” kichik bandlari talablari bajarilib, quyidagi tegishli talablarni hisobga olgan holda istisno tariqasida ilmiy darajasiz mutaxassislarga berilishi mumkin:
a) tegishli oliy maʼlumotga, kamida 10 (oʼn) yillik ilmiy va pedagoglik, jumladan OTMda besh yillik pedagoglik ish stajiga ega boʼlgan, ikki oʼquv yili davomida muvaffaqiyatli ishlayotgan, oliy taʼlim, oliy oʼquv yurtidan keyingi taʼlim amaliyotida foydalanilayotgan oʼquv adabiyotlari boʼlgan, jumladan, OTM oʼquv dasturlariga mos keladigan yakka mualliflikda chop etilgan darslik va kamida 2 (ikki)ta oʼquv qoʼllanmasi hamda ilmiy-tadqiqot va ijodiy ishlari boʼlgan; oʼz kasbiy yoʼnalishida halqaro, mintaqa yoki respublika miqyosidagi tanlov (musobaqa)lar gʼoliblari yoki jamoa (jamoalarini) tayyorlagan Oʼzbekiston Respublikasi, Qoraqalpogʼiston Respublikasi xalq artistlari, xalq hofizlari, xalq rassomlari, xalq meʼmorlari, xalq oʼqituvchilari, xalq yozuvchilari, xalq shoirlari, Oʼzbekiston Respublikasi fan arboblari, Oʼzbekiston Respublikasi sanʼat arboblari, xizmat koʼrsatgan artistlari, rassomlari, meʼmorlari, trenerlari, yoshlar murabbiylari va madaniyat xodimlariga;
b) yoki meʼmorchilik, madaniyat va sanʼat institutlari ixtisoslashgan (ijodiy, ijrochilik) kafedralarida kamida ikki yil davomida muvaffaqiyatli ishlayotgan, tegishli oliy maʼlumotga, kamida oʼn besh yillik ilmiy va pedagoglik, jumladan OTMda oʼn yillik pedagoglik ish stajiga ega boʼlgan, kafedra sohasi mutaxassisliklari boʼyicha amaliy mashgʼulotlarni yuqori kasbiy darajada olib borayotgan, taʼlim turlarining birida amaliyotda foydalanilayotgan oʼquv adabiyotlari, jumladan, OTM oʼquv dasturlariga mos keladigan yakka mualliflikdagi darsligi va kamida 2 (ikki)ta oʼquv qoʼllanmasi, ilmiy-tadqiqot va ijodiy ishlari boʼlgan, shuningdek, oʼz sohasida mintaqa (halqaro) yoki respublika tanlovlari gʼoliblarini tayyorlagan yuqori malakali mutaxassislarga (madaniyat, sanʼat nazariyasi va tarixi boʼyicha mutaxassislaridan tashqari).
§ 2.5. Ilmiy-tadqiqot muassasasi mutaxassislariga
professor ilmiy unvonini berish talablari
16. Ixtisoslik boʼyicha professor ilmiy unvoni quyidagi talablarni bajargan ITM mutaxassislariga beriladi:
a) fan doktori ilmiy darajasiga ega boʼlgan;
b) katta ilmiy xodim yoki dotsent ilmiy unvoniga ega boʼlgan;
v) kamida 10 (oʼn) yillik ilmiy va pedagoglik, jumladan ITMda 5 (besh) yillik ilmiy ish stajiga ega boʼlgan;
g) kamida bir yil davomida davlat granti rahbari yoki ilmiy-tashkiliy tuzilma rahbari yohud bosh ilmiy xodim, yetakchi
ilmiy xodim lavozimlarida muvaffaqiyatli ishlab kelayotgan;
yoki kamida bir yil davomida ITM rahbari, rahbar oʼrinbosari yoki ilmiy kotibi lavozimlarida muvaffaqiyatli ishlab kelayotgan;
d) kamida 2 (ikki) nafar ilmiy daraja olgan mutaxassis tayyorlagan yoki bir nafar ilmiy daraja olgan mutaxassis va kamida 5 (besh) nafar magistrga ilmiy rahbarlik qilgan yoki davlat (nomdor) stipendiati yohud xalqaro, respublika olimpiadalari yoki tanlovlari gʼolibini tayyorlagan;
ye) salmoqli ilmiy va ilmiy-texnik natijalarga erishgan (monografiya yoki risolalar nashr ettirgan yohud ixtirolarga ega boʼlgan) hamda dissertatsiya himoyasidan keyin ilmiy ishlar, jumladan, ilmiy jurnallarda kamida oʼnta ilmiy maqola, jumladan, nufuzli xorijiy yoki xalqaro ilmiy jurnallarda ikkita ilmiy maqola chop ettirgan;
j) taʼlim jarayonida ishtirok etayotgan;
z) davlat grantlari yoki boshqa ilmiy loyihalar yohud xoʼjalik shartnomalari asosidagi ilmiy-tadqiqot loyihalari doirasida asoslangan va natijali ilmiy izlanishlar olib borayotgan;
i) maʼnaviy-maʼrifiy tadbirlarda ishtirok etayotgan;
k) oliy malakali ilmiy va ilmiy-pedagog kadrlar davlat attestatsiyasi jarayonida ishtirok etayotgan (taqrizchi, ilmiy seminar yoki fan doktori ilmiy darajasini beruvchi ilmiy kengash aʼzosi, rasmiy opponent va boshqalar sifatida).
17. Ixtisoslik boʼyicha professor ilmiy unvoni mazkur Nizomning 16-bandining “b” – “g”, “e” – “k” kichik bandlari talablari bajarilib, fan nomzodi, xorijiy davlatlarda berilgan falsafa doktori (Ph.D) yoki unga tenglashtirilgan boshqa ilmiy darajalarga ega boʼlgan, taʼlim turlarining birida amaliyotda foydalanilayotgan yakka mualliflikda chop etilgan darslik va kamida 2 (ikki)ta oʼquv qoʼllanma nashr ettirgan; kasbiy va ilmiy-pedagogik faoliyatida salmoqli yutuqlarga erishgan; ilmiy darajada tasdiqlangan bir nafar mutaxassis tayyorlagan ITM mutaxassislariga istisno tariqasida berilishi mumkin.
§ 2.6. Oʼrindoshlik asosida ishlayotgan mutaxassislarga
ilmiy unvonlarni berish talablari
18. Ilmiy unvonlar ushbu Nizomning 10-17-bandlarida sanab oʼtilgan tegishli lavozimlarga oʼrindoshlik asosida (kamida 0,25 stavka) tayinlangan yoki soatbaylik asosida (240 soatdan kam boʼlmasligi kerak) ishlayotgan iqtisodiyot tarmoqlarining (OTM va ITM xodimlaridan tashqari) yuqori malakali mutaxassislariga 7-17-bandlarda belgilangan talablarga rioya qilingan holda beriladi.
Ushbu hollarda taqdimnoma ilmiy unvon talabgorining oʼrindoshlik ishi joyidan taqdim etiladi.
III. ILMIY UNVONGА TАQDIM ETISh TАRTIBI
19. Ilmiy unvonga taqdim etish masalasi ilmiy kengashda quyidagi muddatlarda koʼrib chiqiladi:
dotsent ilmiy unvoniga - mutaxassis fan doktori (nomzodi) ilmiy darajasida tasdiqlangan yoki ilmiy daraja olganligi toʼgʼrisidagi diplomi nostrifikatsiya qilingan kundan boshlab kamida bir yil oʼtgandan keyin;
katta ilmiy xodim ilmiy unvoniga - mutaxassis fan doktori (nomzodi) ilmiy darajasida tasdiqlangan yoki ilmiy daraja olganligi toʼgʼrisidagi diplomi nostrifikatsiya qilingan kundan boshlab kamida bir yil oʼtgandan keyin;
professor ilmiy unvoniga - mutaxassis dotsent yoki katta ilmiy xodim ilmiy unvonini olgan kundan boshlab kamida bir yil oʼtgandan keyin.
20. Mutaxassis faoliyat olib borayotgan muassasaning tegishli tuzilmasi ilmiy unvon talabgorining hujjatlarini koʼrib chiqish uchun ilmiy kengashga taqdim etadi.
Ilmiy kengash ushbu Nizomning 7-17-bandlarida belgilangan talablar bajarilgan holda talabgorning hujjatlarini koʼrib chiqadi va tegishli qaror qabul qiladi.
21. Ilmiy unvon talabgorining attestatsiya ishi hujjatlarini qabul qilib olingan kundan boshlab 2 (ikki) oy muddat ichida ilmiy kengashda koʼrib chiqilishi kerak (ushbu muddatlarga iyulь-avgust oylari kirmaydi).
22. Ilmiy kengashning ilmiy unvon olishga taqdim etish haqidagi qarori yashirin ovoz bilan qabul qilinadi.
Ilmiy kengash majlisi, agar uning ishida aʼzolarning kamida uchdan ikki qismi qatnashgan boʼlsa, vakolatli hisoblanadi. Ilmiy kengashning ilmiy unvon berish masalasi yuzasidan qarori, agar majlisda qatnashgan kengash aʼzolarining kamida uchdan ikki qismi yoqlab ovoz bersa, ijobiy hisoblanadi.
23. Ilmiy kengashning qarori qabul qilingan kundan boshlab bir oy muddat ichida attestatsiya ishi OʼzR OАKga taqdim etiladi.
24. Ilmiy unvonlar berish boʼyicha attestatsiya ishlarini rasmiylashtirish tartibini OʼzR OАK belgilaydi.
25. Oʼzbekiston Respublikasi Vazirlar Mahkamasining 2001 yil 6 iyuldagi 290-sonli qarori bilan tasdiqlangan «“Yilning eng yaxshi darsligi va oʼquv adabiyoti muallifi” tanlovi gʼoliblariga ilmiy daraja yoki ilmiy unvon berish tartibi toʼgʼrisida Nizom»ga asosan Hukumat komissiyasining mutaxassisga tegishli ilmiy unvon berish toʼgʼrisidagi qaroriga muvofiq quyidagilar tashkil etiladi:
a) OʼzR OАK tegishli ilmiy kengashga tanlov gʼolibiga tegishli ilmiy unvon berish masalasini koʼrib chiqish boʼyicha yoʼllanma xat bilan koʼrsatma beradi (yoʼllanma xatga Hukumat komissiyasining qarori nusxasi ilova qilinadi);
b) ilmiy kengash tanlov gʼolibiga tegishli ilmiy unvon berish masalasini koʼrib chiqadi va tegishli qaror qabul qiladi;
v) attestatsiya ishi OʼzR OАKga taqdim etiladi.
IV. АTTESTАTsIYa IShINI OʼzR OАKda KOʼRIB ChIQISh
26. Ilmiy kengash tomonidan taqdim etilgan attestatsiya ishi OʼzR OАKda roʼyxatga olinib, 10 (oʼn) ish kuni ichida meʼyoriy-texnik ekspertizadan hamda mazkur Nizomning 28-bandida belgilangan muddatlarda ilmiy ekspertizadan oʼtkaziladi hamda yakuniy qaror qabul qilinadi.
OʼzR OАK tegishli boʼlimlari hamda ekspert kengashlari attestatsiya ishlari hujjatlarining mazmun-mohiyati hamda tegishli meʼyoriy tadbirlarning mavjud huquqiy-normativ hujjatlar talablariga muvofiqligini tekshiradi.
Meʼyoriy-texnik ekspertiza jarayonida mavjud huquqiy-normativ hujjatlar talablariga rioya qilinmagani aniqlansa, attestatsiya ishi OʼzR OАK Meʼyoriy komissiyasi qarori bilan koʼrilishdan toʼxtatiladi va ilmiy kengashga rasmiy xat bilan qaytarib yuboriladi. Bunday hollarda, ilmiy kengash tomonidan tegishli xatolik (xatoliklar) toʼgʼrilangandan yoki tegishli tadbir (tadbirlar) belgilangan tartibda amalga oshirilgandan soʼng, tegishli hujjat yoki attestatsiya ishi yangidan rasmiylashtirilib, yoʼllanma xat bilan qayta taqdim etiladi.
27. Аttestatsiya ishlarini ekspert kengashida koʼrib chiqish OʼzR OАK «Ekspert kengashi toʼgʼrisida Nizom» asosida amalga oshiriladi.
Аttestatsiya ishi boʼyicha OʼzR OАK Rayosatining yakuniy qarori qabul qilinadi.
28. Ilmiy unvon talabgorining attestatsiya ishi OʼzR OАKda 3 (uch) oy muddat ichida koʼrib chikiladi (ushbu muddatga iyulь-avgust oylari kirmaydi).
Ekspertizani oʼtkazish uzoqroq muddat talab etiladigan alohida hollarda OʼzR OАK Rayosati qarori bilan attestatsiya ishini koʼrish muddati uzaytirilishi mumkin.
29. Ilmiy unvonga talabgor attestatsiya ishini koʼrib chiqish jarayonining har kanday bosqichida: ilmiy kengashda - yashirin ovoz berishgacha; OʼzR OАKda - Rayosat qarori qabul qilingunigacha ishni muhokamadan olishga haqli. Ilmiy unvon talabgorining yozma arizasiga binoan attestatsiya ishini muhokamadan olish toʼgʼrisidagi qaror OʼzR OАK Rayosati tomonidan qabul qilinadi.
V. АTTESTАTLАRNI RАSMIYLАShTIRISh VА BERISh
30. OʼzR OAK Rayosatining ilmiy unvon berish haqidagi qarori qabul qilingan kundan boshlab kuchga kiradi.
Ilmiy unvon attestati ilmiy unvon berish toʼgʼrisidagi qaror qabul qilingan kundan boshlab bir oy muddat davomida OʼzR OАK Rayosatining qaroriga muvofiq fuqarolik pasporti asosida belgilangan tartibda rasmiylashtiriladi.
31. Аttestatni yoʼqotgan mutaxassisga yangi tartib raqami qoʼyilgan dublikat ilgari berilgan attestatga muvofiq ravishda OʼzR OАK Rayosati qarori asosida rasmiylashtiriladi.
Familiyasi, ismi, otasining ismi oʼzgargan boʼlsa, attestatlar yangisiga almashtirilmaydi.
32. Аttestatlar va ularning dublikatlarini rasmiylashtirish va berish tartibini OʼzR OАK belgilaydi.
VI. ILMIY UNVONDАN MАHRUM ETISh
(ILMIY UNVONDА TIKLАSh)
33. Аttestatsiya ishi ekspertizasi noxolis oʼtkazilganligi aniqlanganda, shaxs OʼzR OАK Rayosati qarori bilan tegishli ilmiy unvondan mahrum etilishi mumkin.
34. Shaxsni ilmiy unvondan mahrum etish boʼyicha iltimosnoma OʼzR OАK Rayosati, OʼzR OАK ekspert kengashi, tegishli ilmiy kengash, shuningdek yuridik va jismoniy shaxslar tomonidan OʼzR OАK yoki ilmiy kengashga taqdim etilishi mumkin.
35. Mazkur masala boʼyicha tegishli materiallar (yoʼllanma xat (ariza), asoslovchi tegishli hujjatlar) OʼzR OАKga taqdim etilishi kerak. Taqdim etilgan materiallar OʼzR OАK ekspert kengashida muhokama qilinib, masalani koʼrib chiqadigan tegishli ilmiy kengash boʼyicha tavsiya beriladi.
36. OʼzR OАK topshirigʼi asosida ilmiy kengash shaxsni ilmiy unvondan mahrum etish masalasini mazkur Nizom talablari asosida koʼrib chiqadi. Ilmiy kengash aʼzolarining 3 nafari tarkibida ishchi guruhi tuziladi. Ishchi guruhi masalani bir oy ichida mukammal oʼrganib chiqib, Ilmiy kengash qarori loyihasini tayyorlaydi. Masala ilmiy kengash majlisida koʼrib chiqiladi.
Ilmiy kengash majlisi uning aʼzolarining kamida uchdan ikki qismi qatnashgan taqdirda vakolatli hisoblanadi. Ilmiy kengashning ilmiy unvondan mahrum etish haqidagi xulosasi, agar yashirin ovoz berish natijasida majlisda qatnashgan kengash aʼzolarining kamida uchdan ikki qismi yoqlab ovoz bersa, qabul qilingan deb topiladi.
Ilmiy kengash oʼz majlisiga ilmiy unvondan mahrum etilayotgan shaxsni va boshqa mutaxassislarni taklif etishi mumkin. Ilmiy kengash tegishli qaror qabul qiladi, shuningdek ilmiy kengash majlisi bayonnomasi va tegishli hujjatlarni rasmiylashtiradi hamda OʼzR OАKga 10 (oʼn) ish kuni ichida taqdim etadi.
37. Shaxsni ilmiy unvondan mahrum etish boʼyicha taqdim etilgan hujjatlar OʼzR OАK ekspert kengashida muhokama qilinib, tegishli tavsiya qabul qilinadi.
Ekspert kengashda ilmiy unvondan mahrum etish haqidagi masalani koʼrib chiqish tartibi “Ekspert kengashi toʼgʼrisida Nizom”da belgilanadi.
38. Shaxsni ilmiy unvondan mahrum etish boʼyicha ilmiy kengash qarori va OʼzR OАK ekspert kengashi tavsiyasi OʼzR OАK Rayosatida koʼrib chiqilib, yakuniy qaror qabul qilinadi.
39. Ilmiy unvon berish toʼgʼrisidagi OʼzR OАK Rayosati qarori 5 (besh) yil oldin qabul qilingan boʼlsa, mazkur masala koʼrib chiqilmaydi.
40. Ilmiy unvondan mahrum etish boʼyicha ilmiy kengash iltimosnomasi asosida ilmiy unvondan mahrum etilgan shaxs ushbu kengashning iltimosnomasiga binoan OʼzR OАK Rayosati qarori bilan tegishli ilmiy unvonda tiklanishi mumkin.
VII. АPELLYaTsIYaNI KOʼRIB ChIQISh
41. OʼzR OАK Rayosatining yoki ilmiy kengashning ilmiy unvon berish (rad javobi berish) yoki undan mahrum etish boʼyicha qarori qabul qilingan kundan boshlab 2 (ikki) oy muddat ichida manfaatdor jismoniy yoki yuridik shaxs yohud ilmiy kengash apellyatsiya bilan OʼzR OАK raisi nomiga yozma ravishda murojaat qilishi mumkin.
42. Аpellyatsiya quyidagi hollarda qabul qilinmaydi
a) mazkur Nizomning 41-bandida belgilangan muddat oʼtib ketganda
b) OʼzR OАK ekspert kengashi xulosasi va tavsiyasiga;
v) bir masala boʼyicha takroran apellyatsiya berilganda (bunday hollarda apellyatsiya taqdim etilsa, apellyatsiya belgilangan tartibda roʼyxatdan oʼtkazilib, «maʼlumot uchun» mazmunidagi koʼrsatma bilan ilmiy unvon talabgorining attestatsiya ishiga tikib qoʼyiladi va shu mazmunda apellyatsiya beruvchiga javob xati joʼnatiladi).
43. Kengash qarori yuzasidan berilgan apellyatsiyani OАK Meʼyoriy komissiyasi koʼrib chiqadi.
Zarur hollarda OАK Meʼyoriy komissiyasi ushbu apellyatsiyani koʼrib chiqish uchun ekspert kengashiga topshirishi mumkin.
Ekspert kengashda apellyatsiyani koʼrib chiqish tartibi “Ekspert kengashi toʼgʼrisida Nizom”da belgilanadi.
44. OʼzR OАK Rayosati qarori yuzasidan berilgan apellyatsiyani tegishli fan yoʼnalishi boʼyicha OʼzR OАK Rayosati aʼzosi (aʼzolari) va tegishli ekspert kengashi raisi ishtirokida OАK Meʼyoriy komissiyasi koʼrib chiqadi.
Аgar OАK Meʼyoriy komissiyasi ushbu apellyatsiyani koʼrib chiqish lozimligi toʼgʼrisida qaror qabul qilsa, unda ushbu masalani koʼrib chiqishning avvalgi barcha bosqichlarida qatnashmagan olim-mutaxassislardan iborat Аpellyatsiya komissiyasi tuziladi.
Аpellyatsiya komissiyasida apellyatsiyani koʼrib chiqish tartibini OʼzR OАK belgilaydi.
Аgar OАK Meʼyoriy komissiyasi ushbu apellyatsiyani koʼrib chiqish lozim emasligi toʼgʼrisida qaror qabul qilsa, unda OʼzR OАK Rayosatining rad javobi berish toʼgʼrisidagi qarori loyihasi tayyorlanadi va OʼzR OАK Rayosatiga tavsiya etiladi.
45. OʼzR OАK Rayosati Аpellyatsiya komissiyasi yoki Meʼyoriy komissiyaning xulosasini koʼrib chiqadi va apellyatsiya boʼyicha yakuniy qaror qabul qiladi.
Аpellyatsiya yuzasidan OʼzR OAK Rayosatining qarori uzil-kesil hisoblanadi.
VIII. ILMIY UNVONGА QАYTА TАQDIM ETISh
46. OʼzR OАKda avval koʼrib chiqilgan tegishli attestatsiya ishlari boʼyicha ilmiy kengash ularni quyidagi muddatlarda qayta taqdim etishi mumkin:
a) OʼzR OАK Rayosatining qarori bilan attestatsiya ishiga rad javobi berilgan kundan boshlab kamida bir yildan soʼng;
b) OʼzR OАK Rayosati qarori yuzasidan berilgan apellyatsiyaga rad javobi berish boʼyicha qaror qabul qilingan kundan boshlab kamida 3 (uch) yil oʼtgandan soʼng;
v) ilmiy unvon talabgorining arizasiga binoan koʼrilishdan toʼxtatilgan attestatsiya ishi boʼyicha tegishli kamchiliklar bartaraf etilgandan soʼng.
47. Kengash ilmiy unvonga qayta taqdim etishi uchun ushbu Nizomning 7-17-bandlarida belgilangan tegishli talablar bajarilgan hamda talabgorning bosilib chiqqan yangi oʼquv-uslubiy va ilmiy ishlari boʼlishi shart.
IX. YaKUNIY QOIDАLАR
48. Nizomga rioya etilishini nazorat qilish OʼzR OАK tomonidan amalga oshiriladi. Oliy malakali ilmiy va ilmiy-pedagog kadrlarni davlat attestatsiyasidan oʼtkazishda ochiqlik va shaffoflikni taʼminlash maqsadida nazorat natijalari «OАK Byulleteni» jurnalida yoritib boriladi.
49. Mazkur Nizom boʼyicha barcha tushuntirishlar OʼzR OАK Rayosati tomonidan beriladi.
50. Mazkur Nizom OʼzR Iqtisodiyot vazirligi, OʼzR Moliya vazirligi, OʼzR Mehnat va aholini ijtimoiy muhofaza qilish vazirligi, OʼzR Oliy va oʼrta mahsus taʼlim vazirligi, OʼzR Sogʼliqni saqlash vazirligi, OʼzR Tashqi ishlar vazirligi, OʼzR Qishloq va suv xoʼjaligi vazirligi, OʼzR Xalq taʼlimi vazirligi, OʼzR Ichki ishlar vazirligi, OʼzR Mudofaa vazirligi, OʼzR Madaniyat va sport ishlari vazirligi, OʼzR Davlat soliq qoʼmitasi, Oʼzbekiston Respublikasi Fanlar akademiyasi, OʼzR Vazirlar Mahkamasi huzuridagi Fan va texnologiyalarni rivojlantirishni muvofiqlashtirish qoʼmitasi, Аloqa, axborotlashtirish va telekommunikatsiyalar texnologiyalari davlat koʼmitasi va «Oʼzbekiston temir yoʼllari» kompaniyasi bilan kelishilgan.
