O‘zbekiston Respublikasi Vazirlar Mahkamasining 2017 yil 22 noyabrdagi 936-sonli qaroriga ko‘ra barcha viloyatlardagi oliygohlar tuzilmasida Qatag‘on qurbonlari xotirasi muzeyining tashkil etilishi belgilab qo‘yilgan edi. Buxoro davlat universitetida ham ushbu qaror ijrosi bo‘yicha qator tashkiliy va ilmiy izlanishlar olib borilishi natijasida 2018 yil 18 may – Xalqaro muzeylar kuni munosobati bilan BuxDU tuzilmasidagi Qatag‘on qurbonlari xotirasi muzeyining tantanali ochilish marosimi bo‘lib o‘tdi. Tadbirda O‘zbekiston Respublikasi Vazirlar Mahkamasi huzuridagi Qatag‘on qurbonlari muzeyi direktori B.V. Hasanov, viloyat hokimligi vakillari, “Nuroniy”, “Mahalla” xayriya jamg‘armalari, professor-o‘qituvchilar, talabalar va qatag‘on bo‘lganlarning oila-a’zolari ishtirok etdilar.
Shuni alohida ta’kidlab o‘tmoq joizki, BuxDU tuzilmasidagi ushbu muzey Respublikamizda birinchilar qatorida tashkil etildi. Muzey 3 ta zaldan iborat bo‘lib, 1865 yildan hozirgi kunga qadar bo‘lgan davrni qamrab oladi. Muzey ekspozisiyasidan XIX asrga oid osiri-atiqalar, qimmatli arxiv hujjatlari, foto va kino hujjatlar o‘rin olgan. Mustaqillik zalida “Kecha va bugun” deb nom olgan ekspozisiya ham joy olgan.
BuxDU tuzilmasidagi Qatag‘on qurbonlari xotirasi muzeyi uchta zaldan tashkil topgan bo‘lib, birinchi zal Chor Rossiyasi bosqini davri (1868-1920 yy), ikkinchi zal Sho‘ro davri (1920 -1991 yy), uchinchi zal Mustaqillik davri. Muzeyga kiraverishda jadidchilik harakatining namoyondalarining suratlari va ikkinchi tomonda “Kecha va bugun” nomli ekspozisiya joylashgan. Birinchi zal O‘rta Osiyoning Rossiya tomonidan bosib olinishi ekspozisiyasi bilan boshlanib Buxoro bombardimoni nomli ekspozisiya bilan tugallanadi.
