Buxoro davlat universitetida “Kibermadaniyatni yuksaltirish oyligi” doirasida Xorijiy tillar fakultetida Raqamli ta’lim texnologiyalari departamenti hamda fakultet tyutorlari hamkorligida bir qator targ‘ibot-tashviqot tadbirlari o‘tkazildi. Tadbirlarning asosiy maqsadi talabalar o‘rtasida raqamli xavfsizlik madaniyatini shakllantirish, internetdan ongli va mas’uliyatli foydalanish ko‘nikmalarini mustahkamlash, shuningdek, onlayn makonda uchraydigan turli xildagi kiberxavflar haqida amaliy ma’lumotlar berishdan iborat bo‘ldi.
Tadbir davomida:
Kiberjinoyatchilikning keng tarqalgan ko‘rinishlari (firibgarlik, fishing, zararli havolalar, yolg‘on investitsiyalar, shaxsiy ma’lumotlarni o‘g‘irlash) haqida ma’lumot berildi.
Talabalar bilan real hayotda uchraydigan kiberhujumlar ssenariylari misolida muhokamalar olib borildi.
Noma’lum fayllar va APK ilovalarni yuklab olish oqibatlari, ijtimoiy tarmoqlarda shaxsiy ma’lumotlarni oshkor etish xavflari, mobil qurilmalarda parol va ikki bosqichli himoya tizimlaridan foydalanish zarurligi alohida tushuntirildi.
Raqamli odob-axloq (netiket), onlayn muloqot madaniyati va mualliflik huquqiga rioya qilish borasida tavsiyalar berildi.
Seminar-trening jarayonida videoroliklar namoyish etildi, savol-javoblar uyushtirildi hamda talabalar o‘rtasida kibersavodxonlik darajasini aniqlash uchun qisqa so'rovnoma o‘tkazildi.
Tadbir yakunida talabalar uchun eslatmalar (parollarni yaratish bo‘yicha tavsiyalar, ishonchli manbalar ro‘yxati, xavfsizlik qoidalari) tarqatildi va ularga shaxsiy raqamli qurilmalaridan to‘g‘ri foydalanish bo‘yicha amaliy ko‘rsatmalar berildi.
Mazkur targ‘ibot ishlari Xorijiy tillar fakultetida kibermadaniyatni ongli ravishda yuksaltirishga, raqamli muhitda mas’uliyatli xatti-harakatlarni shakllantirishga xizmat qildi.
