2025-yil 30-oktabr kuni Buxoro davlat universiteti Tabiiy fanlar va agrobiotexnologiya fakultetida “Kibermadaniyatni yuksaltirish va kibergigiyenani shakllantirish oyligi” doirasida targ‘ibot-tashviqot tadbirlari bo‘lib o‘tdi.
Tadbir Raqamli ta’lim texnologiyalari departamenti boshlig‘i M.Z. Xusenov, departament xodimi R.N. Salimov hamda Yoshlarni ma’naviy yuksalishiga ko‘maklashish departamenti xodimlari hamkorligida tashkil etildi.
Tadbir davomida ishchi xodimlar va talabalar ko‘p uchrayotgan kiberjinoyatlar turlari, shakllari va ularning oqibatlari haqida tayyorlangan videoroliklar namoyish etildi. Xususan, virusli ilovalar, ijtimoiy tarmoqlar orqali tarqatilayotgan zararli “.apk” fayllar, shuningdek, kibermakondagi tahdidlarning keng tarqalgan ko‘rinishlari va ularga sabab bo‘layotgan viktimologik omillar haqida batafsil ma’lumot berildi.
Shuningdek, axborot texnologiyalaridan noto‘g‘ri foydalanishning huquqiy va ijtimoiy oqibatlari, ilgari kiberjinoyatlar sodir etib, jazo o‘tayotgan shaxslarning ogohlantiruvchi intervyulari, hamda kibertahdidlardan himoyalanish choralarini yorituvchi videomateriallar namoyish qilindi.
Hafta davomida universitetda sodir bo‘lgan kiberjinoyatlarni sodda, xalqchil tilda yoritish maqsadida “Kiberjinoyatlar izidan” nomli video kontentlar ham fakultet jamoasiga havola etildi.
Targ‘ibot tadbiri jarayonida internet va ijtimoiy tarmoqlardan xavfsiz foydalanish, bank kartalaridagi mablag‘larni himoyalashning oddiy usullari, shuningdek “1xBet”, “Mostbet”, “Linebet” kabi tavakkalchilikka asoslangan o‘yinlarning inson ongiga salbiy ta’siri haqida** ham batafsil tushuntirishlar berildi.
Shuningdek, universitet professor-o‘qituvchilari, ishchi xodimlari va talabalarining kibersavodxonligini aniqlash maqsadida elektron tarzda o‘tkazilayotgan so‘rovnoma haqida umumiy tushunchalar berildi. Tadbir davomida kibertahdidlarning zamonaviy shakllari va ularning huquqiy oqibatlari, internet va elektron to‘lov vositalaridan foydalanishda xavfsizlik qoidalariga rioya qilmaslikning salbiy ta’sirlari, shuningdek bank kartalari va shaxsiy ma’lumotlarni uchinchi shaxslarga taqdim etmaslik zarurligi haqida ham tavsiyalar berildi.
