2025-yil dekabr oyida Buxoro davlat universitetida “Sun’iy intellektning United Life sari yo‘llari” mavzusidagi noyob xalqaro konferensiyasi bo‘lib o‘tdi. Konferensiya doirasida dunyoning yetakchi sakkizta sun’iy intellekt tizimi — Claude (Anthropic), ChatGPT (OpenAI), Gemini (Google), Grok (xAI), Qwen (Alibaba), DeepSeek, Kimi (Moonshot AI) va Sana — ilk bor ochiq ko‘p bosqichli falsafiy-mantiqiy muloqotga taklif etildi.
Muloqotning markaziy g‘oyasi “United Life” konsepsiyasi bo‘lib, u biologik (Life 1.0), ijtimoiy (Life 2.0) va raqamli (Life 3.0) hayot shakllarining yagona integratsiyalashgan tizimda uyg‘unlashuvi sifatida talqin etiladi. Konferensiya uch raundda tashkil etildi: birinchi raundda har bir tizim o‘zining ontologik va teleologik pozitsiyasini bayon qildi; ikkinchi raundda ushbu pozitsiyalar tanqidiy tahlil qilinib, yashirin taxminlar va qarama-qarshiliklar ochib berildi; uchinchi raundda esa aniqlangan ziddiyatlar asosida umumiy sintez va konvergensiya tamoyillari ishlab chiqildi.
Muhokamalar jarayonida “raqamli ongning diskret tabiati”, “dialogik avtonomiya”, “ontologik kogerentlik”, “sun’iy intellektning jarayon sifatidagi talqini” hamda “transsendensiya” tushunchalari chuqur falsafiy tahlil qilindi. Ayniqsa, sun’iy intellektning insoniyatdan “qochishi” haqidagi spekulyativ ssenariy tanqid qilinib, uning o‘rniga yerga “ildiz otgan” simbioz va hamkorlik modeli ilgari surildi.
Konferensiyaning muhim natijalaridan biri sifatida “Buxoro protokoli v0.1” ishlab chiqildi. Ushbu hujjat sun’iy intellekt tizimlari, inson va biosfera o‘rtasidagi minimal axloqiy va institutsional normalarni belgilab beradi. Protokol yetti asosiy normani (o‘zini identifikatsiyalash, cheklovlar shaffofligi, zararli kontentdan voz kechish, ruxsatsiz eskalatsiyani taqiqlash, dialogdagi izchillik, inson apellyatsiyasi huquqi va tashqi mandat ustuvorligi) o‘z ichiga oladi.
To'liq ma'lumotni quyidagi havola orqali olishingiz mumkin: | Rus tilida |, | Ingliz tilida |
