Mamlakatimizning ko‘p asrlik tarixida mutlaqo yangi sahifa ochgan, el-yurtimizni mustabid tuzum kishanlaridan ozod qilib, erkin va farovon hayot qurish yo‘lini ochib bergan mustaqilligimizning 27 yillik bayrami bilan barchangizni chin qalbimizdan tabriklaymiz.
Yurtimizda har yili mustakillik bayramini alohida shior ostida nishonlash go‘zal an‘anaga aylandi. Bu yil mustaqilligimizning yigirma yetti yillik bayrami “Aziz va yagonamsan, jonajon O‘zbekistonim!” degan bosh g‘oyani o‘zida mujassam etgan tashkiliy-amaliy, ma‘naviy-ma‘rifiy tadbirlar hamda targ‘ibot-tashviqot ishlari asosida o‘tkazilmoqda. Buyuk va bebaho ne‘mat – mustaqillikning milliy taraqqiyotimiz, bugungi va kelgusi avlodlar taqdiri, kelajagi uchun beqiyos ahamiyati yillar o‘tishi bilan tobora ortib bormoqda. O‘zbekistonning davlat mustaqilligi xalqimizning milliy manfaatlarini, tinch va osuda hayotini ta‘minlash, mamlakatimizning xalqaro miqyosdagi obru-e‘tiborini yuksaltirishning mustahkam poydevori bo‘lib kelmoqda.
Bundan yigirma yetti yil avval, endigina mustaqillikka erishgan, milliy taraqqiyotning samarali yo‘llarini axtarayotgan, jamiyat hayotini, iqtisodiyotni, huquq-tartibot tizimini, madaniy-ma‘rifiy, ta‘lim-tarbiya sohalarini yangilayotgan yosh mamlakatning qisqa muddat ichida jahon hamjamiyatining munosib a‘zosiga aylanishini, taraqqiy topgan dunyo davlatlari bilan bo‘ylashishini, ong-shuurimizda, turmush tarzimizda shu qadar katta o‘zgarishlar yuz berishini, shahar va qishloqlarimizning qiyofasi tubdan o‘zgarib ketishini, o‘g‘il-qizlarimizning jahon maydonlarida olamshumul g‘alabalarga erishishini tasavvur qilishning o‘zi bo‘lmasdi. Ne baxtki, bunday yutuqlarga bugun, eng avvalo, o‘zimiz, dunyo hamjamiyati guvoh bo‘lib turibdi. Ona-diyorimiz ulkan qurilish, bunyodkorlik maydoniga aylandi. Tilimiz, dinimiz, tariximiz, milliy qadriyatlarimiz, ulug‘ ajdodlarimizning bebaho merosi o‘zimizga qaytdi.
Bugun har bir fuqaroning orzu-intilishlari ro‘yobga chiqmoqda, odamlarning dunyoqarashi yuksalib, hayotga, mehnatga munosabati tubdan o‘zgarmoqda.
Sizlarni, Mustaqilligimizning 27 yilligi bilan yana bir bor tabriklab, barchangizga tinchlik-omonlik, baxtu saodat, xonadonlaringizga fayzu baraka tilaymiz.
Barcha ezgu ishlarimizda Yaratganning o‘zi qo‘llasin, o‘zi madadkor bo‘lsin!
Yurtimiz tinch, osmonimiz musaffo, xalqimiz omon bo‘lsin!
Mustaqilligimiz abadiy bo‘lsin!
Ma`naviyat va ma`rifat bo`limi boshlig`i
A`zamjon Jumayev
