Hurmatli mehmonlar, qadrdon jamoa!
Avvalombor, hammangizni yaqinlashib kelayotgan “Navro’z” – umumxalq bayrami bilan jamoamiz nomidan qutlayman.
Navro’z – bu yangi kun, yangi orzu-istaklar debochasi, tabiatdagi jonlanishdan zavqlanib, ruhiy tetiklik va iliqlikka intilish ayyomi. U ko’ngillarni ezgulik va bunyodkorlik kayfiyati bilan ravshan etadi. Shuning uchun xalqimiz azaldan Navro’zi olamni bayram qilib, uni cheksiz quvonch va ko’tarinkilik, obodlik va yaratuvchanlik bilan kutib oladi.
Istiqlol yillarida Navro’z millatimizning haqiqiy milliy qiyofasi va g’ururi timsoliga aylandi va unga xos udumlar yanada qadr topdi. Navro’z arafasida biror-bir yangi ob’ektni qurib bitkazib, foydalanishga topshirish go’zal an’analarimizdandir. Shu an’ana asosida o’tgan o’quv yilida universitetimizning 1700 o’rinli 2-o’quv laboratoriya binosi tantanali ochilgan bo’lsa, mana bugun yana shu qutlug’ ayom oldidan, qolaversa, universitetimizning 85 yillik to’yi nishonlanayotgan bir pallada 1750 talabaga mo’ljallangan 1-o’quv binosi va 550 nafar talaba joylashadigan 5- va 6- Talabalar turar joyi ham bitkazildi. Buning natijasida Buxoro davlat universiteti jamoasi 3450 talaba o’qiydigan muhtasham binolarga va 1650 o’ringa mo’ljallangan zamonaviy Talabalar turar joyiga ega bo’ldik.
Albatta, bu ezgu ishlar Muhtaram Prezidentimizning 2011 yilda qabul qilingan 1533-sonli buyruqlarining amaliy ijrosi hamdir.
Ushbu bunyodkorlik jarayonida “Elit” kompaniyasi loyihalash ishlarini, “Kogon Neft-gaz energiya servis” korxonasi qurilish-ta’mirlash ishlarini olib bordi. Bugun Buxoro davlat universiteti jamoasi nomidan ularga cheksiz minnatdorchilik va ulkan rahmatimizni izhor etamiz.
Hammasi bo’lib 2013-2016 yillarga mo’ljallangan ta’mirlash- bunyodkorlik ishlariga ajratilgan mablag’lar hajmi 43 mlrd so’mdan oshadi.
Yana bir katta bunyodkorlik ishi shaxsan Viloyat xokimi Muhitdin Turdiyevich boshchiligida Navoiy ko’chasi bo’ylab Universitet alleyasining qurilishi orqali amalga oshirildi. Bu esa universitet kampusidagi territoriyaning yanada ko’rkamlashib borishiga asos bo’lmoqda. Bularning barchasi professor-o’qituvchilarimiz va talabalarimizning cheksiz olqishiga sazovor bo’lmoqda. Shu munosabat bilan men ham jamoamiz nomidan amalga oshirilgan va oshirilayotgan barcha bunyodkorlik ishlari uchun, avvalo, Prezidentimizga, Oliy va o’rta maxsus ta’lim vazirligiga, Siz hurmatli Muhitdin Turdiyevichga hamda qurilish ishlarini olib borayotgan Karim Jamolovich boshchiligidagi qurilish kompaniyasiga tashakkur bildiramiz.
Buxoro davlat universiteti professor-o’qituvchilari va talabalari yaratilayotgan bunday qulay va zamonaviy shart-sharoit hamda imkoniyatlarga javoban, albatta, o’z intellektual yutuqlari, ilm-fandagi yaratuvchanliklari bilan javob berishlari, universitetimiz nomini respublikamiz va jahon arenasida yuqori bosqichlarga olib chiqishlari kerak va bunga va’da beramiz.
1930 yilda Buxoro davlat pedagogika instituti sifatida tashkil etilgan bu oliy o’quv yurti respublikamizdagi to’ng’ich oliy o’quv yurtlaridan biri bo’lgan. Unda dastlab 17 nafar pedagog-xodim faoliyat ko’rsatgan bo’lsa, hozirda pedagog-xodimlar soni 489 nafarni tashkil etadi. Istiqlol yillarigacha pedagogika instituti sifatida faqat o’qituvchilar etishtirib kelgan bu ta’lim maskani istiqlol yillarida, aniqrog’i, 1992 yilda universitet maqomini olgach, uning imkoniyatlari yanada kengaydi. 1990-91 yillarda uning huzurida bor-yo’g’i 16 ta ta’lim yo’nalishi bo’lgan bo’lsa, hozirda ta’lim yo’nalishlari soni 35 taga etdi.
Hozirgi Urganch (1934), Qarshi (1955), Termiz (1956) davlat universitetlari tashkil topguniga qadar ushbu viloyatlarga Buxoro oliygohi malakali pedagogik xodimlar tayyorlab berishda etakchilik qilgan. Keyinchalik yana u Navoiy davlat pedagogika institutining, Toshkent Irrigasiya va meliorasiya instituti Buxoro filialining bunyodga kelishida asos bo’lgan.
Universitetda falsafa, o’zbek tili va adabiyoti, folklorshunoslik, O’zbekiston tarixi, fizika, biologiya, kimyo, matematika-informatika, psixologiya, pedagogika, iqtisod fanlari bo’yicha ilmiy maktablar yaratilgan. 85 yillik tarix davomida universitetning etakchi olimlari rahbarligida 1000 ga yaqin fan doktorlari va fan nomzodlari tayyorlangan. Istiqlol yillarida universitet professor-o’qituvchilari tomonidan 26 ta doktorlik, 201 ta nomzodlik dissertasiyalari muvaffaqiyatli himoya qilingan. Hozirda universitetda uzoq yillar davomida shakllanib kelgan bu ilmiy maktablarning faoliyatini mana shu mahalliy kadrlar samarali davom ettirib kelmoqdalar.
Hozirda Buxoro davlat universitetida 35 ta’lim yo’nalishi bo’yicha 6246 talaba, 14 mutaxassislik bo’yicha 129 magistr ta’lim olmokda. Shu bilan birga, mavjud 21 ixtisoslik bo’yicha katta ilmiy xodim-izlanuvchilik institutida 22 nafar katta ilmiy xodim-izlanuvchi o’z tadqiqotlarini olib bormoqda.
Hurmatli va qadrdon jamoa, Sizni barchamiz uchun qutlug’ sana munosabati bilan chin qalbimdan muborakbod etaman. Ulug’ va aziz ta’lim maskanimiz ravnaqi yo’lidagi fidoyi mehnatingizni qadrlab, ko’p sonli insonlar taqdirida o’ziga xos qadriyat ramziga aylangan oliygohimizda faoliyat yuritish baxti muyassar bo’lganidan har birimiz hamisha g’urur va iftixorga to’lib-toshib yurish nasib qilishini istab qolaman.
Barcha-barchangizga chuqur hurmatim, ehtiromim, tabrigim va tashakkurimni izhor qilaman!
E’tiborlaringiz uchun rahmat!
