Buxoro davlat universitetida yoshlar ongida halollik, mas’uliyat va huquqiy madaniyatni mustahkamlashga qaratilgan navbatdagi ma’naviy-ma’rifiy tadbir bo‘lib o‘tdi. Tadbir kirish qismida Korrupsiyaga qarshi kurashish “Komplaens-nazorat” tizimini boshqarish bo‘limi boshlig‘i Y. Quliyev, Mir Arab madrasasi o‘qituvchisi Jaloliddin Sobirov hamda BuxDU dotsenti, polkovnik G‘olibov Jo‘rabek so‘zga chiqib, korrupsiyaning jamiyat hayotiga ko‘rsatadigan zararli ta’siri, halollik tamoyillarining ahamiyati va yoshlarning bu boradagi mas’uliyati haqida atroflicha fikr bildirishdi.
Tadbir davomida korrupsiyaning xavf-xatarlarini real misollar orqali yorituvchi maxsus tayyorlangan videorolikka ham namoyish etildi. Unda korrupsion holatlarning hayotiy oqibatlari, ularning shaxs va jamiyat taraqqiyotiga yetkazadigan salbiy ta’siri yaqqol aks ettirildi.
Shundan so‘ng Buxoro viloyati Ichki ishlar boshqarmasi Kiberxavfsizlik boshqarmasi xodimi Islomov Jamshid axborot xavfsizligi mavzusida ma’ruza qilib, internet makonidagi tahdidlar, firibgarlik usullari, shaxsiy ma’lumotlarni himoya qilish tamoyillari va yoshlarning raqamli savodxonligini oshirish zarurati haqida muhim ma’lumotlar berdi.
