Buxoro davlat universitetida 9-dekabr — Xalqaro korrupsiyaga qarshi kurashish kuni munosabati bilan Fizika-matematika va axborot texnologiyalari fakulteti tomonidan “Yangi O‘zbekiston yoshlari korrupsiyaga yo‘l qo‘ymaydi!” nomli ma’naviy-ma’rifiy tadbir tashkil etildi.
Tadbir doirasida universitetning bosh foyesida mavzuga oid ko‘rgazma tashkil etilib, unda korrupsiyaga qarshi kurashga qaratilgan huquqiy hujjatlar, targ‘ibot materiallari va axborotlar namoyish etildi.
Mazkur tadbirni BuxDU Yoshlar masalalari va ma’naviy-ma’rifiy ishlar bo‘yicha birinchi prorektori Akmal Nazarov ochib berib, yoshlarda halollik, adolat va qonunga hurmat tuyg‘ularini shakllantirishda bunday tadbirlarning muhim ahamiyatini ta’kidladi.
Shuningdek, Yorqin Quliyev — Korrupsiyaga qarshi kurashish “Komplaens-nazorat” tizimini boshqarish bo‘limi boshlig‘i hamda Fizika-matematika va axborot texnologiyalari fakulteti dekani Husniddin Jo‘rayev so‘zga chiqib, korrupsiyaga qarshi qabul qilingan qarorlar, amaldagi qonunchilik va ularning ijrosi haqida atroflicha ma’lumotlar berdilar.
Tadbir davomida sahna ko‘rinishlari namoyish etilib, korrupsiyaning jamiyat taraqqiyotiga salbiy ta’siri badiiy ifodalar orqali ochib berildi. Shuningdek, yoshlar tomonidan raqs va qo‘shiqlar ijro etilib, tadbir mazmunan boyitildi.
