Hukumatimiz tomonidan korrupsiyaning oldini olish va unga qarshi kurashish mexanizmlari takomillashtirildi, xususan, oliy ta’lim tizimida korrupsiyaga qarshi kurashishning huquqiy asoslari mustahkamlandi. Shuningdek, oliy ta’lim muassasalarida korrupsiyaga qarshi kurashishga oid alohida bo‘linmalar tashkil etildi. Ishga qabul qilish va xizmat ko‘rsatishning shaffof jarayonlarini tashkil etish, xodimlar va talabalar uchun korrupsiyaga qarshi kurashish bo‘yicha o‘quv dasturlarini ishlab chiqish va amaliyotga joriy etishga alohida e’tibor qaratilmoqda. Akademik korrupsiya oliy ta’lim uchun yashirin tahdid bo‘lib, talabalar, professor-o‘qituvchilar va butun jamiyat uchun jiddiy oqibatlarga olib kelishi mumkin. Bu ta’lim sifatining pasayishiga, ilmiy muassasalarga ishonchning yo‘qolishiga, ilmiy darajalar qiymatining tushishishiga sabab bo‘ladi. Bundan tashqari, akademik korrupsiya tadqiqot va innovatsiyalarga, shuningdek, universitet va kollejlarning obro‘siga salbiy ta’sir ko‘rsatadi. Mazkur metodik qo‘llanmada akademik korrupsiya va uning oliy ta’limga ta’siri atroflicha tahlil qilingan. Metodik qo‘llanmada akademik korrupsiyaning pullik va pulsiz shakllari haqida alohida to‘xtalib o‘tilgan. 1. Akademik korrupsiyaning pulsiz ko‘rinishi: talabalarning ko‘chirmachiligi (plagiat, uydirma, aldash), telefon yordamida imtihonlardan o‘tishlari, internetdan ko‘chirib kurs ishi va malakaviy amaliyotlardan baho olish uchun plagiat qilishlari, tanish-bilish orqali baho olish, kompyuter tizimlarini buzish (sabotaj), kasbiy noto‘g‘ri xatti-harakatlar, talabalar va o‘qituvchi-pro- fessorlar tomonidan institusional hokimiyatdan foydalanish yoki shaxsiy manfaat uchun ma’lumot olish ekanligi tushuniladi. 2. Akademik korrupsiyaning pulli ko‘rinishi: oraliq va yakuniy nazoratlardan sun’iy ravishda yuqori bahoga erishib, talabalar belgilangan stipendiya miqdorini (BSM) bilimiga mos ravishda olmasliklari, qalbaki sertifikatlar, diplomlar taqdim qilib, iqtidorli talabalar safiga o‘tib, imtiyozli stipendiyalar yoki bir martalik 5-10 baravar BSMda pulli rag‘batlantirish, poraxo‘rlik va unga o‘xshash boshqa holatlarni yuzaga keltirish nazarda tutiladi.
