9 dekabr – Xalqaro korrupsiyaga qarshi kurashish kuni
Buxoro viloyati soliq boshqarmasida 9 dekabr – Xalqaro korrupsiyaga qarshi kurashish kuni munosabati bilan “Ochiq eshiklar kuni” o‘tkazildi.
Unda Buxoro Davlat universitetining iqtisodiyot yo‘nalishi 1-bosqich talabalari hamda professor-o‘qituvchilar qatnashdi.
Tadbirda talaba yoshlar soliq boshqarmasida soliq to‘lovchilar uchun yaratilgan sharoitlar hamda soliq xizmati xodimlarining ish jarayonlari va sohaning o‘ziga xos jihatlari bilan yaqindan tanishdi.
Uchrashuvda soliq boshqarmasining Shaxsiy xavfsizlik bo‘limi mas’ullari tadbir ishtirokchilariga bugungi kunda soliq tizimida amalga oshirilayotgan islohotlar, xususan, soliq xizmati organlari xodimlarining “korxonabay” va “mahallabay” ishlash jarayonlari yuzasidan tushuntirish berdi. Ochiq muloqot tarzida o‘tgan uchrashuvda talabalar o‘zlarini qiziqtirgan savollarga mutaxassislar tomonidan javob oldi.
Shuningdek, uchrashuvda viloyat soliq boshqarmasi boshlig‘i Д.Юлдашев yig‘ilganlarga sohadagi o‘zgarishlar va yangiliklar haqida, xususan soliq xizmati organlariga malakali kadrlarni tanlash va ularni joyiga qo‘yish hamda soliq idoralarida korrupsiyaviy jihatlarga barham berish borasida amalga oshirilayotgan chora-tadbirlar haqida batafsil ma’lumot berdi.
Tadbir yakunida talabalarga viloyat soliq boshqarmasi boshlig‘ining esdalik sovg‘alari topshirildi.
