Marsiya
Bir qush edim, parvozi xush,
Osmonimni sogʻindim.
Koʻrganlarim boʻlsaydi tush
Dadam sizni sogʻindim.
Keng hovlining kengligi ham bilinmaydi dadajon,
Opam bugun kelin boʻlib ketayapti dadajon.
Tongda ishga ketsangiz u, tunda qaytib kelsangiz,
Pari qizim, momacha deb, peshonamdan oʻpsangiz.
Rozi edim, mayli bir kun yonimizda yotsangiz .
Keng hovlining kengligi ham bilinmaydi dadajon,
Opam bugun kelin boʻlib ketayapti dadajon.
Oʻn bir oykim sogʻinchlardan ezilaman, yonaman.
Siz siz kelgan bahorlardan rozimasman, tonaman.
Ayting endi kimga dardim ishonaman, yoraman?
Keng hovlining kengligi ham bilinmaydi dadajon,
Opam bugun kelin boʻlib ketayapti dadajon.
Azal taqdir shu ekanda,ajalga hech davo yoʻq,
Kulib chiqib ketgan dadam, bugun sizdan sado yoʻq.
Ming toʻqmoqdek uriladi, kimdir bitta qilsa doʻq,
Keng hovlining kengligi ham bilinmaydi dadajon,
Opam bugun kelin boʻlib ketayapti dadajon.
Momajonim kulgulari sizla ketdi dadam ey,
Ammalarim gʻamdan kuyib ado boʻldi dadam ey,
Bitta ukangiz qaddi ham zor mungʻaydi dadam ey.
Keng hovlining kengligi ham bilinmaydi dadajon,
Opam bugun kelin boʻlib ketayapti dadajon.
Gulshan onam yostiqdoshi, tuproq bolish boʻldimi,
Ayting sizni yutgan yerning qorni toʻyib qoldimi?
Bu qanday dard, murgʻak jonim azoblarga soldimi?
Keng hovlining kengligi ham bilinmaydi dadajon,
Opam bugun kelin boʻlib ketayapti dadajon.
Oq yaktakda hoji boʻlib kelganingiz koʻrsaydim,
Ka'ba koʻrgan koʻzingizdan, yuzingizdan oʻpsaydim.
Qani edi, azadamas, toʻyingizga tursaydim,
Keng hovlining kengligi ham bilinmaydi dadajon.
Opam bugun kelin boʻlib ketayapti dadajon.
"Tilab olgan bolamni goʻrga berdim bolam ov,
Bolamnimas, jonimni yerga berdim bolam ov",
Oʻn bir oykim eshitganim faqat shu soʻz dadam, ov,
Keng hovlining kengligi bilinmaydi dadajon,
Opam bugun kelin boʻlib ketayapti dadajon.
Mehri oftob, tafti olov dadajonim, dadam ey,
Farzandlar deb joni kuygan
Jonfidoyim, dadam ey.
Sogʻindim ku, bir bor koʻray,
Qayting dada, dadam ey,
Keng hovlining kengligi ham bilinmaydi dadajon,
Opam bugun kelin boʻlib ketayapti dadajon.
Uyingizda toʻy boʻlyapti, qani viqor turishlar,
"Uni qilgin, bunga bergin", qani soʻroq qilishlar.
Mahliyongiz qay tizzaga bosh uradi bilmayman,
Tamom qildi meni dadam, unsiz chiqqan nolishlar.
Keng hovlining kengligi ham bilinmaydi dadajon.
Opam bugun kelin boʻlib ketayapti dadajon.
Opajonim, Alloh oʻzi baxtingiz goʻzal qilsin,
Mahmud dadam umrini ham sizlarga sovgʻa qilsin.
Yoʻq yigʻlamang, yoshingizni artgani dadam yoʻqdir,
U jannatda, faqatgina kelgani chipta yoʻqdir .
Keng hovlining kengligi ham bilinmaydi dadajon,
Sizday odam yuz yilda ham tugʻilmaydi dadajon...
Rushana Mirzohidovna
