2015- yilda turkiy xalq olimlari ichida Aziz Sanjar birinchi bo‘lib Nobel mukofotiga munosib ko‘rilgan edi. Kuni kecha turkiyalik ushbu taniqli bioximik olim yurtimizga tashrifi doirasida Buxoroda ham bo‘ldi. U dastlab qadimiy va navqiron go‘shamizdagi madaniy va tarixiy yodgorliklarni borib ko‘rdi. Shundan so‘ng Buxoro davlat universitetida jahon miqyosidagi mazkur yirik mutaxassis bilan uchrashuv o‘tkazildi. Respublika Oliy va o‘rta maxsus ta’lim vazirligi, O‘zbekiston milliy universiteti hamda BuxDU hamkorligida uyushtirilgan bu tadbirda professor-o‘qituvchilar, ilmiy tadqiqotchilar, talabalar ishtirok etishdi.
Dastlab ushbu bilim dargohi prorektori Durdimurod Durdiev so‘zga chiqib, xorijning nufuzli ta`lim muassasalari va dunyoning ko`zga ko`ringan olimlari bilan hamkorlik aloqalari jadal rivojlanayotganligini ta`kidladi. O‘z navbatida O‘zMU rahbariyati vakili Rasuljon Rahmonov uzoq yillardan buyon AQSHning Shimoliy Karolina universiteti professori sifatida faoliyat ko‘rsatayotgan, DNKni tiklash bo‘yicha ulkan tadqiqotlar olib borgan turk olimining ilmiy izlanishlari, yutuqlari haqida yig‘ilganlarga muxtasar ma’lumot berdi.
Shundan so‘ng Nobel sohibiga so‘z berildi. U bu yerga avvalambor yoshlar bilan suhbatlashish, ularni ilm olishga chorlash maqsadida kelganligini, negaki o‘zbek xalqining aynan navqiron avlodi ma`rifat vositasida ulkan cho‘qqilarni egallaganini, Beruniy, Ibn Sinodek ajdodlari kabi nafaqat o‘z yurtlarining, balki butun insoniyat taraqqiyotiga munosib ulush qo‘shajaklarini ta`kidladi.
Bundan tashqari, olim ilm-fanning kishilik jamiyatidagi o‘rni, ko‘p asrlar muqaddam turkiy xalqlardan, chunonchi, o‘zbeklardan chiqqan allomalarning dunyo tamadduniga qo‘shgan beqiyos hissasi, qolaversa, turkiyzabon ellarning bugunga kelib jahon ilm-fanida o‘z mavqeini boy berganligi, buning bosh sabablari xususida ham to‘xtaldi. Shuningdek, uning uch yil muqaddam dunyodagi eng nufuzli mukofotni qo‘lga kiritganligi nafaqat Turkiya, balki butun boshli turkiy dunyo uchun bemisl muvaffaqiyat ekanligini, bu hol xalqlarimizning jahon sivilizatsiyasidagi o‘rnini tiklash yo‘lida ulkan qadam bo‘lganligini qayd etdi.
Aziz Sanjar yurtimiz, xususan, Buxoro haqidagi fikrlarini o‘rtoqlasharkan, ko‘hna go‘shamizga nisbatan ixlosi benihoya balandligini, buxorolik olimlar, talaba yoshlar bilan ushbu uchrashuvdan mamnunligini ham aytib o‘tdi.
O‘z izlanishlari orqali inson umrini uzaytirishga erishishni ko‘zlagan olim tadbir davomida BuxDU tadqiqotchilari va talabalarining savollariga mufassal javob berdi.
