Buxoro davlat universitetiga Fransiyaning O‘zbekistondagi elchisi Violen de Vilmor xonim tashrif buyurdi. Mehmonlarni BuxDU rektori vazifasini bajaruvchi Arif Kadirov kutib oldi.
Elchi xonim universitetning filologiya fakultetida bo‘lib nemis-fransuz kafedrasi faoliyati bilan tanishdi va fransuz tilini o‘rganayotgan talabalar hamda ularning ustozlari bilan muloqotda bo‘ldi.
Universitetning kichik majlislar zalida Vilmor xonim bilan uchrashuv bo‘lib o‘tdi. Uchrashuvda mehmonlar e’tibori ta’lim sohasida amalga oshirilayotgan o‘zgarishlar va yangilanishlar, shuningdek fransuz tilini o‘rgatish borasida amalga oshirilayotgan ishlarga qaratildi.
O‘z navbatida Vilmor xonim Fransiyadagi oliygohlarning O‘zbekistondagi xuddi shunday ta’lim dargohlari bilan olib borilayotgan aloqalar to‘g‘risida gapirdi. BuxDU bilan ham ilm-fan va ta’lim yo‘nalishida hamkorlik qilish, talabalarga fransuz tilini sof va mukammal o‘rganishlari uchun imkon qadar ko‘maklashish niyatida ekanligini bildirdi. Ayniqsa, filologiya, maktabgacha ta’lim va turizm fakultetlari bilan hamkorlik yo‘nalishida o‘qituvchilar almashish yaxshi samara berishiga to‘xtaldi.
BuxDU turizm fakulteti dekani Abror Jo‘raev, nemis va fransuz kafedrasi mudiri Malohat Jo‘raevalar bunday hamkorlik tilni sof o‘rganish bilan bir qatorda, fransuz sayyohlarini ko‘payishini ta’minlashga xizmat qilishini ham ta’kidlashdi.
Tadbir so‘ngida Buxoro shahridagi 39-umumiy o‘rta ta’lim maktabida ikki yildan buyon fransuz tilini o‘rganib kelayotgan 4-sinf o‘quvchilari namoyish etgan fransuz tilidagi she’r, qo‘shiq va raqslar elchi xonimga katta taassurot qoldirdi, desak mubolag‘a bo‘lmaydi.
Bu hayajon Vilmor xonimning yuz-ko‘zlarida aks etib turdi.
