25.04.2026

Buxoro davlat universitetida XXI asrning eng dolzarb muammolaridan biri — “XXI asrda madaniy xilma-xillik va ekologik barqarorlikni birlashtirish” mavzusidagi nufuzli xalqaro ilmiy-nazariy anjuman bo‘lib o‘tdi. Dunyoning o‘ndan ortiq mamlakatlaridan kelgan yetuk olimlar, UNESCO ekspertlari va tadqiqotchilarni bir maydonga jamlagan ushbu forum ilm-fan va tabiat uyg‘unligini ta’minlash yo‘lidagi muhim strategik qadam bo‘ldi.

Anjumanning tantanali ochilish marosimida Buxoro davlat universiteti rektori, professor Obidjon Xamidov kirish so‘zi bilan chiqib, global iqlim o‘zgarishlari va globallashuv sharoitida milliy qadriyatlarni asrash hamda ekologik muvozanatni tiklashning hayotiy ahamiyatiga to‘xtaldi:

“Bugun biz yashayotgan XXI asr insoniyatdan nafaqat texnologik taraqqiyotni, balki ma’naviy merosimiz va ona tabiatimiz o‘rtasidagi uzviy bog‘liqlikni qayta tiklashni talab etmoqda. Madaniy xilma-xillik — jamiyatning intellektual boyligi, ekologik barqarorlik esa — yashashimiz kafolatidir. Ushbu ikki tushunchani birlashtirmasdan turib, barqaror kelajakni tasavvur qilib bo‘lmaydi. Buxoro kabi qadimiy ilm-fan markazida dunyo olimlarining ushbu masala yuzasidan fikr almashishi ramziy va strategik ahamiyatga ega”.

Anjumanda Turkiyaning nufuzli oliy ta’lim muassasalari vakillari — Karamanoglu Mehmetbey University prorektori, professor Idris Nebi Uysal hamda Ahi Evran University prorektori, professor Musa Ozatalar ishtirok etib, O‘zbekiston va Turkiya o‘rtasidagi ilmiy hamkorlikning yangi ufqlarini e’tirof etdilar.

Forumning yalpi majlisida dunyo ilm-fani namoyandalari, xususan, UNESCO ekspertlari Harriet Deacon (Buyuk Britaniya) va Benedetta Ubertazzi (Italiya), Yale University vakili Jonas Elbousty (AQSh), Alan Reid Libert (Avstraliya/Ozarbayjon), National University of Malaysia professori Azlina Abdul Aziz, Haryanto (Indoneziya), Andalas University vakili Handoko, Hacettepe University professori Dogan Nadi Leblebici, Ibn Haldun University professori Jaber Kamali, Cenk Demirkiran hamda Ali Janlar o‘z ma’ruzalari bilan ishtirok etdilar.

Ikki kun davom etgan anjuman doirasida ishtirokchilar madaniy merosni ekologik xavflardan himoya qilish, barqaror rivojlanish maqsadlariga erishishda milliy qadriyatlarning o‘rni hamda raqamli dunyoda madaniyatlararo muloqotni rivojlantirish masalalarini muhokama qildilar. Forum yakunida xalqaro ekspertlar tomonidan global muammolar yechimiga qaratilgan maxsus tavsiyalar paketi ishlab chiqilishi rejalashtirildi.

BuxDU Axborot xizmati