23.03.2026

Muhtaram Prezidentimiz Shavkat Mirziyoyevning Samarqand viloyatiga tashrifi davomida Imom Moturidiy va Imom Buxoriy kabi ulug' allomalarimiz nomi bilan bog'liq qadamjolarda amalga oshirilayotgan bunyodkorlik ishlari bilan yaqindan tanishgani, ushbu tabarruk maskanlarning ma'naviy, ilmiy va tarbiyaviy ahamiyatiga alohida e'tibor qaratgani yurtimizda milliy va diniy-ma'rifiy merosimizni asrash, o'rganish hamda uni kelajak avlodga yetkazish borasida olib borilayotgan davlat siyosatining amaliy ifodasidir.
Ayniqsa, Imom Moturidiy majmuasini qayta bunyod etish, uning hududida masjid, kutubxona, muzey va zamonaviy infratuzilma obyektlarini barpo etish, shuningdek, buyuk faqih Burhoniddin Marg'inoniy dafn etilgan maskan aniqlanib, bu yerda ham maqbara qurilayotgani Yangi O'zbekiston sharoitida ajdodlar merosiga bo'lgan yuksak ehtiromning yorqin namunasidir. Bu ezgu ishlar nafaqat tarixiy xotirani tiklashga, balki xalqimiz, ayniqsa yosh avlod qalbida buyuk ajdodlarimiz bilan faxrlanish tuyg'usini mustahkamlashga xizmat qiladi.
Shuningdek, Imom Buxoriy majmuasining ulug' muhaddis bobomizning islom olamidagi yuksak maqomiga monand ravishda qayta bunyod etilgani, bu maskanda ziyoratchilar uchun zamonaviy va qulay sharoitlar yaratilgani, ilmiy-ma'rifiy mazmundagi innovatsion muzey, masjid, turizm markazi va xizmat ko'rsatish infratuzilmasi barpo etilgani butun musulmon olami uchun muhim voqelikdir. Bu, shubhasiz, mamlakatimizning ilm-ma'rifat, bag'rikenglik va ezgulik tamoyillariga sodiqligini yana bir bor namoyon etadi.
Davlatimiz rahbarining ushbu qadamjolarni nafaqat ziyoratgoh, balki haqiqiy ilm, ma'rifat, tarbiya va ibrat maskaniga aylantirish yuzasidan bildirgan fikrlari oliy ta'lim tizimi, xususan, universitetlar zimmasiga ham katta mas'uliyat yuklaydi. Chunki Imom Moturidiy, Imom Buxoriy, Imom Termiziy, Burhoniddin Marg'inoniy kabi buyuk allomalarimizning boy ilmiy-ma'naviy merosi yoshlarni sog'lom e'tiqod, yuksak axloq, vatanparvarlik, bag'rikenglik va ma'rifat ruhida tarbiyalashda beqiyos manba bo'lib xizmat qiladi.
Buxoro davlat universiteti jamoasi sifatida biz Prezidentimiz tomonidan ilgari surilgan ushbu g'oyalar va tashabbuslarni to'liq qo'llab-quvvatlaymiz. Zero, bugungi globallashuv va murakkab mafkuraviy jarayonlar davrida yoshlarni turli zararli g'oya va oqimlardan asrash, ularning qalbi va ongida mustahkam ma'naviy immunitetni shakllantirishda buyuk ajdodlarimizning ilmiy merosi, ma'rifatparvarlik qarashlari va hayot yo'li muhim o'rin tutadi.
Shu ma'noda, Imom Moturidiy va Imom Buxoriy kabi allomalarimiz nomi bilan bog'liq majmualarning bunyod etilishi va yanada obod maskanlarga aylantirilishi faqat me'moriy yoki tarixiy ahamiyatga ega ish emas, balki bu xalqimizning ma'naviy yuksalishi, milliy o'zligini anglash va ilm-ma'rifatga tayangan taraqqiyot yo'lidan qat'iy borayotganining amaliy tasdig'idir.
Ayniqsa, Prezidentimiz tomonidan "majmuaga kelgan kishi, avvalo, allomaning ilmiy-ma'naviy merosi va islom olamida tutgan mavqei haqida yorqin tasavvurga ega bo'lishi kerak" degan mazmundagi fikrlar ilgari surilgani nihoyatda muhimdir. Bu yondashuv mazkur maskanlarning chuqur mazmun bilan boyitilishini, ularning tarbiyaviy va ma'rifiy ta'sir kuchini yanada oshirishni taqozo etadi. Bu esa, o'z navbatida, ilmiy muassasalar, oliy ta'lim tashkilotlari, tadqiqotchilar va mutaxassislar oldiga ham dolzarb vazifalarni qo'yadi.
Buxoro davlat universiteti bundan buyon ham yurtimizda olib borilayotgan ma'naviy-ma'rifiy islohotlar, ilm-fan va ta'lim rivoji, ajdodlar merosini chuqur o'rganish va targ'ib etish borasidagi ulkan ishlarga munosib hissa qo'shishga tayyor. Universitetimizda tahsil olayotgan yoshlar qalbida buyuk allomalarimizga munosib bo'lish, ularning ilmiy jasorati va ma'rifatparvarlik an'analarini davom ettirish ruhini shakllantirish biz uchun ustuvor vazifalardan biridir.

Muhtaram Prezidentimizning Samarqanddagi ushbu tarixiy va ma'naviy ahamiyatga ega tashrifi, ulug' ajdodlarimiz merosiga ko'rsatayotgan yuksak e'tibori barchamizga katta ruhiy kuch, ilhom va mas'uliyat bag'ishlaydi. Ishonamizki, bunday ezgu tashabbuslar tufayli yurtimizda ilm, ma'rifat, ezgulik va bag'rikenglik g'oyalari yanada mustahkam qaror topadi, muqaddas qadamjolarimiz esa nafaqat ziyorat, balki tafakkur, tarbiya va kamolot maskanlariga aylanadi.

Obidjon Xamidov
O'zLiDeP Buxoro viloyati Kengashi raisi, Xalq deputatlari viloyat Kengashi deputati, Xalq deputatlari viloyat Kengashining Mahalliy byudjet, tadbirkorlikni rivojlantirish va iqtisodiy islohotlar masalalari bo'yicha doimiy komissiyasi raisi, Buxoro davlat universiteti rektori, iqtisodiyot fanlari doktori, professor