Tarix va yuridik fakulteti

Tarix fakultetining tashkil etilishi Buxoro davlat pedagogika instituti (hozirgi BuxDU) ochilgan 1930-yil bilan bir vaqtga to‘g‘ri keladi. O‘sha davrda fizika-matematika, kimyo-biologiya, filologiya, tarix va jamiyatshunoslik kabi to‘rt bo‘lim ish boshlagan. Institutga qabul qilingan ilk qaldirg‘och talabalarning bir qismi tarixchi talabalar edi. 1934-yilda “Tarix va jamiyatshunoslik” bo‘limi bazasida mustaqil Tarix fakulteti tashkil etildi. Fakultetning asosiy maqsadi tarix va jamiyatshunoslik fanlari bo‘yicha o‘rta maktablar uchun o‘qituvchilar tayyorlash etib belgilandi. Fakultet faoliyatining birinchi yillarida VKP (b) tarixi, SSSR tarixi, Komintern tarixi, umumiy tarix, falsafa va pedagogika fanlari o‘qitildi.

1960-yillarning o‘rtalariga qadar Tarix fakulteti qoshida Qarshi va Termiz filiallari faoliyat ko‘rsatib, Qashqadaryo va Surxondaryo viloyatlarining o‘rta, o‘rta maxsus va oliy o‘quv yurtlari uchun ham ko‘plab mutaxassislar yetkazib berdi.

Tarix va madaniy meros fakulteti 2018-yil 5-aprelda Tarix fakulteti negizida tashkil etilgan. 2019-yil 1-avgustdan Jo‘rayev Jamshed Rahmatilloyevich fakultet dekani lavozimida ishlab kelmoqda.

2022-yil avgust oyida Buxoro davlat universiteti Ilmiy kengashi qarori bilan fakultet nomi Tarix va yuridik fakulteti deb o‘zgartirildi. Fakultet tarkibida 5 ta kafedra: Arxeologiya va Buxoro tarixi kafedrasi, Jahon tarixi kafedrasi, Yurisprudensiya va ijtimoiy-siyosiy fanlar kafedrasi, Islom tarixi va manbashunosligi, falsafa kafedrasi hamda Psixologiya va sotsiologiya kafedrasi mavjud bo‘lib, 11 ta ta’lim yo‘nalishi va 7 ta magistratura mutaxassisligi faoliyat ko‘rsatmoqda. Jami 2000 ga yaqin talaba tahsil olmoqda.

Ta’lim yo‘nalishlari va mutaxassisliklari

Bakalavriat:

1) Tarix (jahon mamlakatlari bo‘yicha);

2) Milliy g‘oya va ma’naviyat asoslari, huquq ta’limi (faqat 4-bosqich talabalari mavjud);

3) Arxeologiya;

4) Tarix (islom tarixi va manbashunosligi);

5) Ijtimoiy ish (oila va bolalar bilan ishlash);

6) Yurisprudensiya (faoliyat turlari bo‘yicha);

7) Siyosatshunoslik;

8) Sotsiologiya;

9) Psixologiya (oila psixologiyasi);

10) Psixologiya (amaliy psixologiya).

Magistratura:

1) Tarix (yo‘nalishlar va mamlakatlar bo‘yicha);

2) Tarixshunoslik, manbashunoslik va tarixiy tadqiqotlar usullari;

3) Etnografiya, etnologiya va antropologiya;

4) Arxeologiya;

5) Islom tarixi va manbashunosligi;

6) Advokatura;

7) Psixologiya (umumiy psixologiya).

Ilmiy-tadqiqot va ta’lim sohasidagi hamkorlik

— O‘zbekiston Milliy universiteti;

— Samarqand davlat universiteti;

— Navoiy davlat pedagogika instituti;

— Nizomiy nomidagi TDPI;

— O‘zRFA “Arxeologiya” instituti;

— O‘zRFA “Tarix” instituti;

— O‘zRFA “Falsafa” instituti;

— Buxoro muhandislik-texnologiya instituti.

Ilmiy-tadqiqot sohasidagi xalqaro hamkorlik

— Moskva davlat universiteti (Rossiya);

— Janubiy Federal universiteti (Rossiya);

— Kazan Federal universiteti (Rossiya);

— Novosibirsk davlat universiteti (Rossiya);

— Tomsk Federal universiteti (Rossiya);

— Sankt-Peterburg davlat universiteti (Rossiya);

— Malayziya texnika universiteti (Malayziya);

— Turkiyaning Anqara, Istanbul, Rajab Tayib universitetlari;

— Misrning Al-Azhar, Ayn-Shams, Qohira hamda Tanta universitetlari;

— Xitoyning Shimoli-g‘arbiy universiteti.

Fakultetda erishilgan yutuqlar

Fakultetda ta’lim yo‘nalishlari bo‘yicha o‘quv adabiyotlari, monografiyalar, o‘quv-uslubiy qo‘llanmalar va ishlanmalar hamda o‘qitiladigan fanlarning o‘quv-uslubiy majmualarini tayyorlashga alohida e’tibor qaratilgan. Yaratilgan elektron majmualar Buxoro davlat universitetining axborot resurslari markazi, ZiyoNet tarmog‘i va fakultet veb-saytiga joylashtirib borilmoqda.

Professor-o‘qituvchilar tomonidan oxirgi 3 yilda 10 ta darslik, 30 ta monografiya, 20 ta o‘quv qo‘llanma, 30 ta o‘quv-uslubiy qo‘llanma, 150 dan ortiq maqola va tezislar chop etildi.

Mazkur yillarda fakultetda 5 ta xalqaro va 10 ta Respublika miqyosidagi ilmiy-amaliy anjumanlar tashkil qilindi.

Fakultetda iqtidorli talabalarni ilmiy-tadqiqot ishlariga jalb qilish yaxshi yo‘lga qo‘yilgan. 2019–2022-yillarda 4 ta Davlat stipendiyasi sovrindori tayyorlandi.