2021-yilning 13-fevral kuni Ekologiya va geografiya kafedrasi professori, b.f.d. А.E. Xolliyev hamda Olot va Qorakoʼl tumanlarida tuman hokimlari va masʼul shaxslar oʼrtasida viloyat ayniqsa, Olot va Qorakoʼl tumanlari tuproqlaridagi shoʼrlanish, qurgʼoqchilik, yuqori harorat va garmsel muammosi, uning xosilga taʼsiri hamda ushbu muammolarni oldini olish yoʼllari mavzusida uchrashuv boʼlib oʼtgan edi. Uchrashuvda olim oʼzining “Olot va qorakoʼl tumanlari hududida noqulay ekologik omillar taʼsirini yumshatishda terak-ihotazorlar tashkil etishning ilmiy va amaliy asoslari (muammo, taklif va yechimlar)” mavzusidagi loyihasini taqdimot qildi. Ushbu loyiha Olot va Qorakoʼl tumanlari hokimlari tomonidan qoʼllab quvvatlandi hamda ushbu tumanlar hududida 10 mingdan ortiq terak koʼchatlari ekildi.
Universitet hamda Xorazm viloyatida faoliyat olib boruvchi, baliqchilikka ixtisoslashgan “Bekchan usta” MChJ oʼrtasida tuzilgan 134-sonli fan va ishlab chiqarish oʼrtasidagi innovatsion korporativ hamkorlik shartnomasiga asosan (umumiy summasi 50,0 mln. soʼm), korxonaga tegishli baliqchilik xoʼjaligida Biologiya kafedrasi professori, b.f.d. S.B. Boʼriyev rahbarligida ishlab chiqilgan “Mikroskopik suvoʼtlarni (xlorella, stsenedesmus) va yuksak suv oʼsimliklarini (pistiya, ryaska) koʼpaytirish va ularni baliqchilikda hamda oqova suvlarni tozalashda qoʼllash” loyihasi amalga oshirilmoqda. Dastlabki bosqichda bajarilgan ishlar yuzasidan universitet hisob raqamiga tushum amalga oshirildi.
Oʼzbekiston Respublikasi Prezidentining 2021-yil 1-apreldagi “Ilmiy va innovatsion faoliyatni rivojlantirish boʼyicha davlat boshqaruvi tizimini takomillashtirish toʼgʼrisida”gi 6198-sonli Farmonida nazarga tutilgan vazifalar boʼyicha ilmiy-tadqiqot faoliyati tashkil etildi. Xususan, ushbu qarorda Buxoro viloyati Romitan tumanini innovatsion hududga aylantirish vazifasi belgilangan edi. Shu maqsadda Romitan tumanida “Granulali omuxta yem ishlab chiqarishni tashkil etish” hamda “Resurs tejamkor ohorlovchi polimer-kompozitsiyalar (texnik-kraxmal) yaratish va toʼqimachilik korxonalarida joriy etish” loyihalari amaliyotga joriy qilindi.
