13.05.2026

Ayni kunlarda qadimiy Buxoro shahri zamonaviy media olamining muhim muloqot maydoniga aylanmoqda. O‘zbekiston Respublikasi Prezidenti Administratsiyasi huzuridagi Ommaviy axborot vositalari uchun kontent tayyorlash markazi tashabbusi bilan viloyat hokimligi, Yoshlar ishlari agentligi hamda Jurnalistlar uyushmasi hamkorligida tashkil etilgan “Media haftalik” doirasida jurnalistlar, blogerlar, mobilograflar, matbuot kotiblari va yosh kontent yaratuvchilar uchun seminar-treninglar hamda mahorat darslari o‘tkazilmoqda.

Abu Ali ibn Sino nomidagi Buxoro davlat tibbiyot institutida tashkil etilgan mashg‘ulotlarda ishtirokchilar strategik kommunikatsiya, media etikasi, faktcheking, raqamli gigiyena, sun’iy intellektdan kontent tayyorlashda foydalanish, vizual storytelling, montaj hamda ijtimoiy tarmoqlar algoritmlari bilan ishlash bo‘yicha amaliy bilimlarga ega bo‘lmoqda.

Tadbirlarda Buxoro davlat universiteti, Buxoro davlat tibbiyot instituti, Buxoro davlat pedagogika instituti, Buxoro davlat texnika universiteti, viloyat va tuman hokimliklari hamda turli tashkilotlar axborot xizmatlari rahbarlari bilan bir qatorda OAV vakillari, televideniye va radio jurnalistlari, gazeta va jurnallar tahririyati a’zolari, muharrirlar, blogerlar, mobilograflar hamda hududiy telekanallar xodimlari ham faol ishtirok etmoqda. Seminar treninglarda shuningdek, Buxoro davlat universiteti Filologiya fakulteti Axborot xizmati va jurnalistika ta’lim yo‘nalishlarining 60 nafardan ortiq talabalari hamda professor-o‘qituvchilari ham faol ishtirok etmoqda.

Haftalik doirasidagi ochiq muloqot va tajriba almashuvlari media sohasida zamonaviy yondashuvlarni shakllantirish, axborot bilan ishlash madaniyatini rivojlantirish hamda professional media muhitini mustahkamlashga xizmat qilmoqda. Mazkur loyiha yosh jurnalistlar va kontent yaratuvchilar uchun tajriba almashish, yangi bilim va ko‘nikmalarni egallashda muhim maydon bo‘lib xizmat qilmoqda.

BuxDU Axborot xizmati