03.04.2026

Buxoro davlat universitetida O‘zbekiston Respublikasi Mustaqilligining 35 yilligiga bag‘ishlangan “Semiotika va poststrukturalizm muammolari” mavzusidagi nufuzli xalqaro ilmiy-nazariy anjuman o‘z ishini boshladi.

Mazkur xalqaro forum Buxoro davlat universiteti hamda Muxtor Avezov nomidagi Adabiyot va san’at instituti hamkorligida, filologiya fanlari doktori, professor Gʻayrat Murodov tashabbusi bilan tashkil etildi.

Anjumanning ochilish marosimida BuxDU rektori, professor Obidjon Xamidov so‘zga chiqib, mamlakatimizda ilm-fanni rivojlantirishga qaratilayotgan yuksak e’tibor, oliy ta’lim tizimi va xalqaro akademik hamkorlikning strategik ahamiyati haqida to‘xtaldi. Shuningdek, O‘zbekiston Yozuvchilar uyushmasi viloyat bo‘limi raisi Shodmon Sulaymonov tadbirning adabiyotshunoslik va milliy tafakkur rivojidagi o‘rnini alohida ta’kidladi.

Anjumanning yalpi majlisi gumanitar fanlarning dolzarb yo‘nalishlari bo‘yicha mahalliy va xorijiy olimlarning fundamental ma’ruzalari bilan boy bo‘ldi:
— Alisher Navoiy nomidagi Toshkent davlat oʻzbek tili va adabiyoti universiteti professori Uzoq Jo‘raqulov “Parodiyaviy so‘z silsilasi” mavzusida badiiy matn tahlilining o‘ziga xos jihatlarini yoritdi;
— dotsent Faizulla Toltay (Qozog‘iston) Ulug‘bek Yesdaulet matni misolida dekonstruksiya usulining ilmiy talqinlarini taqdim etdi;
— xalqaro hamkorlar — Istanbul University vakili Mürsade Meryem Kılıç hamda Baku Slavic University dotsenti Ulker Yusifova semiyotika va poststrukturalizmning jahon adabiyotshunosligidagi zamonaviy tendensiyalari yuzasidan ma’ruza qildilar.

3–4-aprel kunlari davom etadigan ushbu anjuman doirasida semiyotika, matn tahlili va poststrukturalizmning falsafiy-estetik asoslari sho‘ba yig‘ilishlarida atroflicha muhokama qilinadi.

Mazkur ilmiy muloqot maydoni zamonaviy adabiyotshunoslik, tilshunoslik va falsafa fanlari integratsiyasini yangi bosqichga olib chiqish, shuningdek, mintaqadagi akademik aloqalarni mustahkamlashga xizmat qiladi.