02.04.2026

Buxoro davlat universitetida “Payshanba — yoshlar kuni” munosabati bilan ilm-fan, sport va ijtimoiy sohalarda yuksak natijalarga erishgan talabalar hamda o‘quvchilarni rag‘batlantirishga bag‘ishlangan tantanali taqdirlash marosimi bo‘lib o‘tdi.

Anjuman ochilishida universitetning yoshlar masalalari va ma’naviy-ma’rifiy ishlar bo‘yicha birinchi prorektori Akmal Nazarov so‘zga chiqib, bugungi kunda mamlakatimizda yoshlar siyosati darajasida ko‘rsatilayotgan g‘amxo‘rlik va oliygohda yaratilgan keng imkoniyatlar o‘z samarasini berayotganini ta’kidladi.

Marosim doirasida universitet nufuzini xalqaro hamda respublika maydonlarida munosib himoya qilgan bir guruh iqtidorli yoshlar tantanali ravishda taqdirlandi. Xususan:

• Prezident va nomli davlat stipendiyalari sovrindorlari;
• Prezident granti hamda Fitrat stipendiyasi sohiblari;
• Turkmanistonda o‘tkazilgan “OMOUS-2026” xalqaro matematika olimpiadasida g‘oliblikni qo‘lga kiritgan jamoa a’zolari;
• “Rektor stipendiyasi” tanlovining universitet bosqichi hamda universitet tasarrufidagi Qorako‘l akademik litseyi o‘quvchilari orasidan saralangan g‘oliblar.

Tadbirning eng hayajonli lahzalaridan biri — iqtidorli yoshlarni tarbiyalashda o‘z bilim va mahoratini ayamagan, davlat stipendiatlarini tayyorlagan ilmiy rahbarlar va ustozlarning alohida rag‘batlantirilishi bo‘ldi.

Shuningdek, Xorijiy tillar fakulteti tashabbusi bilan viloyatdagi 200 nafarga yaqin o‘quvchini qamrab olgan fan olimpiadasining 7-mavsumi g‘oliblari ham munosib e’tirof etildi. Fakultet dekani, professor Nozimjon Ataboev g‘oliblarni qutlar ekan, yoshlarning chet tillarini o‘rganishga bo‘lgan intilishi yurtimizning kelgusi taraqqiyoti uchun muhim omil ekanini qayd etdi.