Buxoro davlat universitetida ilm-fan olamining nufuzli tadbirlari — “Bukhara International Chemistry Olympiad (BICHO-2026)” hamda “Bukhara International Mathematics Olympiad (BIMO-2026)” xalqaro olimpiadalari ochilish marosimi tashkil etildi. Tantanali ochilish marosimi O‘zbekiston Respublikasining Davlat madhiyasi sadolari ostida boshlandi.
Ushbu intellektual bellashuvda dunyoning 10 dan ortiq davlatidan, jumladan, Rossiya, Turkmaniston, Iordaniya, Pokiston, Ozarbayjon, Hindiston, Xitoy va Tojikistondan kelgan jamoalar ishtirok etmoqda. Jami 100 dan ortiq jamoa, 500 nafardan ziyod iqtidorli talabalar, shuningdek, 10 dan ortiq xorijiy va 50 dan ortiq respublika oliy ta’lim muassasalarining vakillari ayni damda universitetda jam bo‘lib, o‘z bilim va salohiyatlarini namoyon etishadi.
Marosimni BuxDU rektori Obidjon Xamidov nomidan universitetning Xalqaro hamkorlik bo‘yicha prorektori Abror Jo‘rayev rasman ochib berib, mazkur olimpiadalar xalqlar o‘rtasidagi do‘stlik va akademik hamkorlik ramzi ekanini e’tirof etdi.
Tadbirda Oliy ta’lim, fan va innovatsiyalar vazirligi huzuridagi Oliy ta’limni rivojlantirish tadqiqotlari markazi rahbari Abduvali Xoliqov ishtirok etib, Oliy ta’lim, fan va innovatsiyalar vazirining ishtirokchilarga yo‘llagan bayram tabrigini o‘qib eshittirdi.
Shuningdek, Buxoro viloyati hokimi o‘rinbosari Hafiza Artikova so‘zga chiqib, viloyat hokimining tabrigini jamoatchilikka yetkazdi. Unda Buxoroning asrlar davomida ilm-fan va sivilizatsiya markazi bo‘lib kelgani, bugungi tadbir esa ushbu an’analarning munosib davomchisi ekani ta’kidlandi.
Tantanali marosimda ishtirokchilarga xizmat safari bilan xorijda bo‘lib turgan BuxDU rektori, olimpiada tashkiliy qo‘mitasi raisi Obidjon Xamidovning maxsus video murojaati namoyish etildi.
