Yurtimizda ekologik barqarorlikni mustahkamlash, yashil hududlarni kengaytirish va kelajak avlodga sog‘lom tabiatni meros qilib qoldirish maqsadida amalga oshirilayotgan “Yashil makon” umummilliy tashabbusi doirasida Buxoro davlat universiteti 2700 o‘rinli yangi o‘quv binosi atrofi bo‘ylab navbatdagi xayrli ezgu ish amalga oshirildi.
Mazkur tadbirda viloyat hokimi o‘rinbosari Jalol Arashov, universitet rahbariyati, professor-o‘qituvchilar, Binolarni saqlash va obodonlashtirish departamenti xodimlari hamda talaba-yoshlar faol ishtirok etdi. Jarayon ko‘tarinki ruh, birdamlik va mas’uliyat bilan o‘tdi.
Tadbir davomida hozirgi ekologik sharoitda har bir daraxtning, har bir yashil maydonning beqiyos ahamiyati alohida ta’kidlandi. Ko‘chat ekish jarayonida viloyat va tuman faollari, ta’lim muassasalari xodimlari hamda keng jamoatchilik bir yoqadan bosh chiqarib mehnat qilishdi. Bu amaliy harakatlar yoshlar uchun chinakam namuna bo‘ldi.
Yangi hududda 20 tup chinni gujum, 1000 tup tuya archa, 105 tup sosna archa va 250 tup gujum daraxtlari ekildi. Har bir ko‘chat — fidoyilik, e’tibor, mehr va mas’uliyatning yorqin timsoli.
Shuningdek, loyiha doirasida hudud to‘liq obodonlashtirildi, sug‘orish tizimlari yangilandi va ko‘chatlarni muntazam parvarishlab borish uchun zamonaviy texnik vositalar o‘rnatildi. BuxDU jamoasining ushbu tashabbusi nafaqat ekologik muhitni yaxshilashga, balki jamiyatda tabiatga mehr-muhabbat ruhini mustahkamlashga xizmat qilmoqda.
