Mazkur ilm dargohi talabalari shahar miqyosida o‘n ikki sport turi bo‘yicha o‘tkazilgan saralash bellashuvlarida futbol, voleybol, gandbol, suzish, kurash, belbog‘li kurash, yengil atletika, basketbol hamda tennis musobaqalarida birinchi o‘rinni egallab, Toshkent shahri terma jamoasi tarkibiga qo‘shildi. Navqiron avlodning jismoniy va ma’naviy kamolotga erishishida muhim omil bo‘layotgan uch bosqichli uzluksiz sport tizimining eng yuqori bo‘g‘ini – Universiada talabalar o‘rtasida sog‘lom turmush tarzini qaror toptirish, jismoniy tarbiya va sportni yanada ommalashtirishdan tashqari, xalqaro maydonlarda yurtimiz sharafini munosib himoya qiladigan sportchilar safini kengaytirishi bilan ham ahamiyatlidir. Universiada musobaqalarida qatnashib kelayotgan talabalar o‘rtasida Olimpiya o‘yinlari, qit’a va jahon chempionatlarida g‘olib va sovrindor bo‘lgan sportchilarning ko‘pligi ham buning isbotidir.– Kurash bo‘yicha qit’a va jahon miqyosidagi musobaqalarda ko‘p bor gilamga chiqqanman, – deydi dzyudo bo‘yicha Osiyo o‘yinlari g‘olibi Mirjon To’xtayev. – Talabalarning yoshlik, birdamlik va go‘zallik bayrami – Universiada musobaqalarida birinchi marotaba qatnashaman va shuning uchun unga katta ishtiyoq bilan tayyorgarlik ko‘rmoqdaman. Bugungi kunda Buxoro viloyatida oliy o‘quv yurtlari talabalari o‘rtasida o‘tkaziladigan “Universiada-2013” musobaqasiga qizg‘in tayyorgarlik ko‘rilmoqda.
