1. Kutubxona va axborot resurslari
Universitetda ta’lim va ilmiy-tadqiqot jarayonlarini samarali tashkil etish maqsadida markaziy kutubxona va uning tarkibiy filial kutubxonalari faoliyat yuritmoqda. Kutubxona infratuzilmasi zamonaviy axborot resurslari bilan ta’minlangan bo‘lib, quyidagi imkoniyatlarni taklif etadi:
· Talabalar va professor-o‘qituvchilar uchun bosma hamda elektron shakldagi darsliklar, o‘quv qo‘llanmalar, monografiyalar, ilmiy maqolalar va jurnallar mavjud.
· Foydalanuvchilar EBSCO kabi xalqaro ilmiy ma’lumotlar bazasiga onlayn kirish imkoniyatiga ega.
· Elektron kutubxona platformasi orqali foydalanuvchilar universitet hududidan tashqarida ham masofaviy tarzda resurslardan foydalanish imkoniyatiga egalar.
· Kutubxona haftaning olti kuni davomida 8:00 dan 22:00 gacha faoliyat yuritadi va o‘quv yili davomida uzluksiz xizmat ko‘rsatadi.
Ushbu kutubxona resurslari ta’lim jarayonining ilmiylik darajasini oshirish, talabalarning mustaqil izlanish ko‘nikmalarini rivojlantirish va o‘qituvchilarning ilmiy faoliyatini qo‘llab-quvvatlashga xizmat qiladi.
2. IT infratuzilma va raqamli ta’lim vositalari
Universitetda talabalar va o‘qituvchilar ta’lim jarayonini samarali tashkil etish uchun keng qamrovli IT infratuzilma va zamonaviy raqamli vositalar bilan ta’minlangan. Dasturga jalb qilingan talabalar quyidagi imkoniyatlardan foydalanadilar:
· Fakultetlar infratuzilmasi – barcha fakultetlarda zamonaviy kompyuter sinflari, yuqori tezlikdagi Wi-Fi tarmoqlari, printer va skanerlar mavjud;
· Raqamli o‘qitish platformalari – ta’lim jarayonida Moodle, Uniwork, Hemis, Zoom kabi Learning Management System (LMS) va onlayn muloqot platformalari faol qo‘llaniladi;
· Masofaviy ta’lim imkoniyatlari – onlayn topshiriqlar, testlar va dars materiallari LMS orqali talabalar va o‘qituvchilar o‘rtasida uzatiladi;
· Innovatsion ta’lim vositalari – ayrim fanlar uchun simulyatsiya dasturlari va virtual laboratoriyalar joriy etilgan bo‘lib, bu talabalar uchun real amaliy tajribaga yaqinlashgan ta’lim muhitini yaratadi.
Ushbu IT infratuzilma va raqamli ta’lim vositalari talabalar bilimini mustaqil o‘zlashtirish, muloqot qilish va zamonaviy texnologiyalar bilan ishlash ko‘nikmalarini rivojlantirishga xizmat qiladi.
3. Akademik va psixologik qo‘llab-quvvatlash
Universitetda talabalarni o‘qish jarayonida qo‘llab-quvvatlash maqsadida individual yordam ko‘rsatish tizimi yo‘lga qo‘yilgan. Ushbu tizim har bir talabaning o‘quv faoliyati va shaxsiy rivojlanishini samarali davom ettirishiga ko‘maklashadi.
· Akademik mentorlik – har bir talaba uchun akademik mentor (kurator) biriktiriladi. Mentor talabaning o‘quv rejasini bajarishi, baholash natijalari va rivojlanish yo‘nalishlarini kuzatib boradi hamda zarur tavsiyalar beradi.
· Konsultatsiya soatlari – kafedra o‘qituvchilari tomonidan belgilangan konsultatsiya va qabul soatlarida talabalar o‘z savollariga bevosita javob olish imkoniga ega.
· Psixologik maslahat xizmati – talabalarga stress, moslashish jarayoni yoki ijtimoiy muammolar yuzasidan malakali psixologik yordam ko‘rsatiladi.
· Ochiq va bepul xizmatlar – barcha qo‘llab-quvvatlash xizmatlari talabalarning ixtiyorida bo‘lib, ular uchun bepul va doimiy foydalanish imkoniyati yaratilgan.
Mazkur qo‘llab-quvvatlash tizimi talabalar farovonligi, o‘quv motivatsiyasi va akademik natijalarini oshirishga xizmat qiladi.
4. Ijtimoiy va moddiy qo‘llab-quvvatlash
Universitetda barcha talabalar, ayniqsa ijtimoiy himoyaga muhtoj toifalarning ta’lim jarayonini uzluksiz davom ettirishlari uchun keng qamrovli ijtimoiy va moddiy qo‘llab-quvvatlash tizimi mavjud.
· Moliyaviy yordam – kam ta’minlangan talabalar, yetimlar va nogironligi bo‘lgan talabalar uchun maxsus stipendiyalar, moddiy yordam paketlari va grant dasturlari yo‘lga qo‘yilgan.
· Turar joy bilan ta’minlash – universitet yotoqxona siyosatini talabalarning ehtiyojlarini inobatga olgan holda amalga oshiradi, ustuvorlik ijtimoiy himoyaga muhtoj talabalar uchun beriladi.
· Sog‘liq va sport infratuzilmasi – talabalar uchun sog‘liqni saqlash punktlari, sport zallari, shuningdek, turli madaniy va ijodiy to‘garaklar faoliyat yuritadi.
· Qo‘llab-quvvatlovchi muhit – mazkur imkoniyatlar talabalarning nafaqat o‘qish jarayonini muvaffaqiyatli olib borishiga, balki sog‘lom va ijtimoiy faol muhitda rivojlanishiga xizmat qiladi.
Ushbu qo‘llab-quvvatlash tizimi ta’lim jarayonining uzluksizligi, talabalar farovonligi va ijtimoiy barqarorlikni ta’minlashga yo‘naltirilgan.
5. Kasbiy yo‘naltirish va Karyera markazi xizmatlari
Universitet qoshida faoliyat yuritayotgan Karyera markazi talabalar va bitiruvchilarning mehnat bozoriga muvaffaqiyatli kirib borishlari hamda kasbiy rivojlanishlarini qo‘llab-quvvatlashga qaratilgan keng ko‘lamli xizmatlarni taklif etadi.
· Ish beruvchilar bilan uchrashuvlar – muntazam ravishda Career Day, yarmarkalar, forumlar va seminarlar o‘tkazilib, talabalar to‘g‘ridan-to‘g‘ri ish beruvchilar bilan muloqot qilish imkoniga ega bo‘ladilar.
· Kasbiy tayyorgarlik treninglari – rezyume va motivatsion xat yozish, suhbatga tayyorgarlik va mehnat bozorida o‘zini taqdim etish ko‘nikmalari bo‘yicha treninglar tashkil etiladi.
· Bitiruvchilar monitoringi – bitiruvchilarning bandlik holati va karyera rivojlanishi statistikasi yuritiladi, bu ma’lumotlar ta’lim dasturlarini mehnat bozori talablariga moslashtirishda foydalaniladi.
Karyera markazining faoliyati bitiruvchilarning mehnat bozoriga moslashuvchan va raqobatbardosh kadr sifatida chiqishini ta’minlashga xizmat qiladi.
