Eron Islom Respublikasi “Boqir al-ulum” (Baqir al-Olum University) universiteti tarixchi olimlaridan iborat delegatsiya 2024 yil 16 sentabr kuni Buxoro davlat universiteti, Tarix va yuridik fakultetining “Islom tarixi va manbashunosligi, falsafa” kafedrasida mehmon bo‘lishdi.
Eron Islom Respublikasidan tashrif buyurgan mehmonlarni, kafedra dotsenti Husen Djurayev mehmonxonada kutib olib, tarixchi olimlarga hamrohlik qilib Buxoroyi sharifning diqqatga sazovor, qadimiy me’moriy joylari bilan tanishtirdi.
Boqir al-ulum universiteti tarixchi olimlari avval universitetning “Qatag‘on qurbonlari” xotira muzeyida bo‘lishdi. Muzeyda mehmonlarni universitet Xalqaro aloqalar bo‘yicha prorektori Abror Jo‘rayev va muzey direktori Azalshoh Hamroyevlar kutib olishdi. Mehmonlar muzey bilan tanishib, tashrif kitobiga dastxat qoldirishdi. Mehmonlar va universitetimiz rahbariyati ular bilan esdalik sovg‘alari berish orqali o‘zaro hurmat ko‘rsatishdi.
Tarixchi olimlar, tashrif davomida “Islom tarixi va manbashunosligi, falsafa” kafedrasida bo‘lib, kafedrada ularni kafedra mudirasi dotsent, Difuza Sayfullaeva va professor-o‘qituvchilari kutib olishdi. Kafedra mudirasi, ingliz tilida mehmonlarga kafedra hamda uning istiqboli haqida va shu jumladan, talabalarga hozirgi kunda fors tilidan dars berib borilishi haqida kafedra katta o‘qituvchisi, Orifjon Berdiyevlar gapirib berishdi.
Tanishuv va suhbat davomida mehmonlarga, “San’at va pedagogika” kafedrasi xonandalari tomonidan Buxoroning mashhur “Shash maqomi” kuylab berildi. Suhbat asnosida mehmonlar “Tarix va yuridik” fakulteti dekani, professor Bobir Namozov bilan telefon orqali muloqotda bo‘lib, kelajakda oliygohlar bilan hamkorlik qilishlik istiqbolli rejalari aytib o‘tildi.
Tarixchi olimlar fakultet auditoriyalarida dars jarayonlarida bo‘lib, ular bilan arab, fors va ingliz tillarida so‘zlashib, talaba-yoshlarimizga yaratilgan shart-sharoitlari va ularning bilim ko‘nikmalari bilan savol-javob asosida tanishishdi.
Mehmonlar universitet ARM kutubxonasi va islohotlar markazida ham bo‘lib, u yerda saqlanadigan qo‘lyozmalar bilan tanishdi.
Xullas, Eron Islom Respublikasi “Boqir al-ulum” (Baqir al-Olum University) universiteti tarixchi olimlari, Buxoro davlat universiteti, Tarix va yuridik fakultet “Islom tarixi va manbashunosligi, falsafa” kafedrasi professor-o‘qituvchilari va rahbariyatidan qilingan mehmondo‘stliklaridan mamnun bo‘lib, universitet professor-o‘qituvchilarini, “Boqir al-ulum” (Baqir al-Olum University) universitetida hamkor va mehmon sifatida kutib qolishlarini bildirishdi.
