Mustaqillik yillarida DTSga muvofiq, Oliy ta’lim hamda umumta’lim maktablari uchun barcha fanlarning dasturlari tubdan isloh qilib yangilandi. Davlat byudjetining 60 foizdan ortig`i ta’lim, sog`liqni saqlash va ijtimoiy sohaga yo`naltirilganligi mamlakatimizda olib borilayotgan odilona siyosatning muhim belgisi deyish mumkin.Kelajagimizning poydevori bo`lgan yoshlarimizni Milliy istiqlol ruhi asosida tarbiyalash bugungi kunning eng mas’uliyali vazifalaridan biridir. Yoshlarning kasb-hunar o`rganib, ilm-ma’rifatni puxta egallashlari uchun diyorimizda barcha imkoniyat va shart sharoitlar a’lo darajada yaratilgan. Bu esa, mamlakatimizda olib borilayotgan ta’lim izchilligi tizimining shakllanishida muhim rol o`ynadi. Xalq xo`jaligining barcha soha va yo`nalishlarida tegishli tartibda yangilanish jarayoni davom etayotgan ayni bir paytda darslik va o`quv qo`llanmalarining yangi avlodlari paydo bo`ldi. Bugun intelektual salohiyatli yoshlarni tarbiyalashda zamonaviy fan va texnologiyalarning qo`llanilayotganligi, maktab, litsey, kollej va oliy ta’lim muassalarida tahsil olayotgan talaba yoshlarning YAPTlar asosida tahsil olayotganligining o`zi katta imkoniyat va samara nishonasidir. Mamlakatimizning eng faol, zukko va bilimdon olimlari tomonidan ishlab chiqilayotgan yangi ixtiro, ratsionalizatorlik takliflari, ilmiy yaratmalari bevosita hayotga tadbiq etilayotgani, ayniqsa e’tiborlidir. Keng ko`lamdagi fundamental tadqiqotlar bilan shug`ullanayotgan ilm fidoiylari tomonidan nashr etilayotgan kitoblarning sanab adog`iga yetmaysan. Ana shunday ishlar va ularnig mualliflari turli nufuzli tashkilot va idoralar tomonidan tashkil etilayotgan tanlovlarning g`olibi sifatida e’tirof etilayotganligining o`zi quvonarlidir. Bir necha yildan buyon O`zbekiston Respublikasi Oliy va o`rta-maxsus, Xalq ta’limi vazirliklari hamda Respublika “Iste’dod” jamg`armasi tomonidan tashkil etilgan “Yilning eng yaxshi darsligi va o`quv adabiyoti muallifi” Respublika tanlovi g`oliblarini taqdirlash marosimida taqdirlangan bir guruh viloyatdoshlrimizning yutuqlari barchamizda yuksak iftixor tuyg`usini uyg`otdi, desak yanglishmagan bo`lamiz. Bu yilgi ilm-ma’rifat tanlovida respublikamiz Oliy ta’lim muassasalarining 262 nafar etuk olim, iqtidorli mutaxassis va izlanuvchi tadqiqotchilarining 191 nomdagi darslik va o`quv qo`llanmalari tanlov hay’atiga tavsiya etildi.Taqdirlangan orasida viloyatimizda o`ziga xos mavqega ega bo`lgan o`quv maskanlaridan biri Buxoro davlat universiteti jamoasidan ham bir qator professor-o`qituvchilarining ishlari borligi ahamiyatlidir. Bu biz uchun ham g`urur, ham faxr bo`lishi bilan birgalikda g`oyatda yuksak mas’uliyat hamdir,- deydi “Yilning eng yaxshi darsligi va o`quv adabiyoti muallifi” tanlovining g`olibi, kimyo fanlari nomzodi, dotsent Mansur Ergashev – ustozim professor Rahmat SHoymardonov bilan birgalikda qilgan mehnatlarimizning bunday yuksak mukofot bilan taqdirlanishi va shunday tanlovda ishtirok etib g`olib bo`lishning o`zi biz uchun-sharaf. Umuman, ilmda ushbu ishimiz orqali, mamlakatimiz ta’lim tizimida joriy etilgan ustoz-shogird maktabining amaldagi ifodasini ko`rsatdik desak yanglishmaymiz. Yuqorida ta’kidlaganimizdek, ushbu tanlovda Buxoro davlat universitetidan besh nafar muallifning ishlari alohida e’tirof etildi. Zahmatkash fidoiy olimlar, professor Rahmat Shoymardonov va dotsent Mansur Ergashevlarning akademik litseylarning tabiiy fanlar yo`nalishi o`quvchilari uchun “Organik kimyo” o`quv qo`llanmasi 1-o`ringa munosib ko`rilgan bo`lsa, yosh izlanuvchan o`qituvchi Manuchehr Ibragimovning “Futbol madaniyati” nomli uchun o`quv qo`llanmasi, oliy ta’lim yo`nalishi bo`yicha birinchi o`ringa loyiq deb topildi. Buxoro geograflarining ustozlaridan biri dotsent Isroil Nazarovning “Geografiya fanining asosiy muammolari”o`quv qo`llanmasi oliy ta’lim yo`nalishi bo`yicha uchinchi o`ringa munosib ko`rildi. Shuningdek, ustozlar izidan borayotgan iqtidorli muallim Mehriddin Abdullaev “Yengil atletika” (To`siqlar osha yuguruvchilarni umumiy, maxsus jismoniy tayyorgarligini oshirish va o`rgatish uslubiyoti) oliy ta’lim uchun yaratilgan o`quv qo`llanmasi bilan rag`batlantiruvchi mukofot egasi bo`ldi. O`quv qo`llanmalar mualliflari tegishli diplom, faxriy yorliq va qimmatbaho mukofotlar bilan taqdirlandilar. BuxDUning 85 yillik tantanalariga munosib sovg`a bo`lgan ushbu yutuqlar jamoa professor-o`qituvchilari va talaba yoshlarini ilmning yangi marralari sari yana etaklayveradi deb o`ylaymiz. Sitora Umarova BuxDU magistranti
