Tabiiy fanlar faulteti professor-o‘qituvchilari orasida “Korrupsiya – kelajakka tahdid” mavzusida tadbir bo‘lib o‘tdi. Tadbir mehmonlari sifatida Buxoro viloyat korrupsiyaga qarshi kurashish bo‘yicha hududiy kengash a’zolari, Buxoro viloyat ichki ishlar bo‘limi xodimlari, Buxoro shahar IIO FMB JXX XPB VE va YOBIG VEMB xodimlari hamda BuxDU “Komplaens” nazorat bo‘limi boshlig‘i va xodimlari ishtirok etishdi. Tadbirni fakultet dekani E.D.Niyozov kirish so‘zi bilan ochib berdi. Shundan so‘ng so‘z BuxDU “Komplaens” nazorat bo‘limi boshlig‘i Y.K.Quliyevga berildi. Yorqin Karimovich, universitetda yuz berayotgan korrupsion holatlar haqida fikr bildirib, bu holatga qarshi kurashishga barcha xodimlar baravar mas’ul ekanligini qat’iy ta’kidlab o‘tdi. Noorganik va fizkolloid kimyo kafedrasi dotsenti H.T.Avezov so‘zga chiqib, jamiyatimizdagi bu illatning nega avj olib ketish sabablarini aytib o‘tar ekan, 1990-yillarda oddiy asistent-o‘qituvchining bir oylik maoshiga 1 qop un bergan bo‘lsa, hozirgi maoshiga 15-16 qop un berishi mumkinligini, shunday to‘qchilik zamonda pora evaziga ish bajarish – bu og‘ir jinoyat ekanligini ming bir afsus va nadomatlar bilan aytib o‘tdi. Tadbirga Buxoro viloyat ichki ishlar bo‘limi xodimi, mayor Sh.Sh.Qurbonov va Buxoro shahar IIO FMB JXX XPB VE va YOBIG VEMB katta inspektori psixolog podpolkovnik N.S.Abzalovalar ham so‘zga chiqib korrupsiya va uning ayanchli oqibatlari haqida o‘zlarining fikr-mulohazalarini bildirdilar. Tadbir tashkilotchilari Tabiiy fanlar fakulteti Yoshlar bilan ishlash bo‘yicha dekan o‘rinbosari G.S.Halimova hamda fakultet tyutorlari tadbirni ko‘tarinki ruhda o‘tishiga alohida hissa qo‘shishdi. Tadbir bahs-munozaralarga, professor-o‘qituvchilar tomonidan bildirilgan taklif va istaklarga boy bo‘ldi.
