OHIM
Gullaganda yana bog'larim,
Balki ketar dildan dog'larim,
Kelmasmikin o'sha chog'larim,
Bahor seni juda sog'indim.
Taqdir yo'lni ayro etganda,
Armonlarga qo'lim tutgandim,
Hijronlarga boshimni qo'yib,
Bahor seni juda sog'indim.
Nahot endi barchasi bekor,
O'tib borar tunlarim bedor,
Bo'lib qoldi xayollar bemor,
Bahor seni juda sog'indim.
Qizg'aldoqqa o'xshadim mana,
Yomg'ir yog'ib selga yuvindim,
Nola qilib doim xudoga,
Bahor seni juda sog'indim.
Kun-u oylar, yillar o'tsa ham,
Savolimga javob izladim,
Tushlarimda hatto kirar g'am,
Bahor seni juda sog'indim.
"Muslima ham baxtli bo'laman"
Shu so'zlarni aytib ovundim,
Hazilmas lek chindan so'zlabon,
Bahor seni juda sog'indim.
Umrim asta o'tib bormoqda,
Hasratlarim ko'ksim tilmoqda,
Faqat o'sha o'tmish qolmoqda,
Bahor seni juda sog'indim.
✍️Dilnura Jurayeva
BuxDu filologiya fakulteti 1 - bosqich talabasi
