BuxDUda viloyatdagi oliy ta‘lim muassasalari o‘rtasida “Talabalar teatr studiyalari” festivali bo‘lib o‘tdi. Dastlab unversitetning yoshlar bilan ishlash bo‘yicha prorektori O. Qodirov so‘zga chiqib, yoshlar jamoalariga omad tiladi. Shundan so‘ng, Buxoro tibbiyot institutining “Avitsena” jamoasi Abu Ali ibn Sino hayoti va faoliyatiga bag‘ishlangan sahna ko‘rinishini namoyish qildi. Toshkent irrigatsiya va qishloq xo‘jaligini mexanizatsiyalash institutining Buxoro filali “Nihol” jamoasi Chingiz Aytmatovning “Asrga tatigulik kun” romani asosida tayyorlagan sahna ko‘rinishini tomoshabinlar hukmiga havola qildi. Unda manqurtlik iskanjasiga solingan farzand o‘z onasini qotili bo‘lgani barchaning ko‘ziga yosh keltirdi. Qolaversa, BuxDUning “Fitrat” jamoasi Usmon Azim qalamiga mansub “Kunduzsiz kechalar” asari asosida Cho‘lpon hayoti va ijod yo‘liga bag‘ishlangan sahna asarini namoyish qildi. Bu sahna asarini kuzatganlar o‘zbekning buyuk, vatanparvar shoiri iztiroblarini qalban tuydilar. Buxoro muhandislik-texnologiya institutining “Yosh muhandislar ” jamoasini “Hovli” nomli sahna asari esa yig‘ilganlarga samimiy tabassum hadya etdi. Tadbir yakunida BuxDUning “Fitrat” jamoasini sahna asari bir ovozdan “Eng yaxshi spektakl” deya e‘tirof qilindi. Shuningdek, festivalning faol ishtirokchilari bir qator nominatsiyalar bo‘yicha rag‘batlantirildi. Unversitetning Yoshlar ittifoqi yetakchisi F. Nurillayevga “Eng namunali yetakchi” nominatsiyasining topshirilishi shular jumlasidandir. Endi BuxDUning “Fitrat” jamoasi festivalning hududiy bosqichida ishtirok etadi.Obid QO‘LDOShOV
