08.04.2026

Buxoro davlat universitetida O‘zbekiston Respublikasi Oliy ta’lim, fan va innovatsiyalar vaziri o‘rinbosari O‘ktam Salomov ishtirokida universitet rektori boshchiligida prorektorlar, bo‘lim va departament rahbarlari bilan uchrashuv bo‘lib o‘tdi.

Uchrashuv davomida O‘zbekiston Respublikasi Prezidentining 2026-yil 4-apreldagi PF–54-son Farmoni mazmun-mohiyati yuzasidan batafsil tushuntirish berildi. Mazkur farmon asosida oliy ta’lim va ilmiy muassasalarning innovatsion faoliyatini qo‘llab-quvvatlash, ilmiy ishlanmalarni tijoratlashtirish, texnologik transfer mexanizmlarini rivojlantirish hamda ishlab chiqarishga joriy etish jarayonlarini takomillashtirish ustuvor vazifalar sifatida belgilanganligi ta’kidlandi.

Xususan, endilikda oliy ta’lim va ilmiy muassasalar muassisligida “spin-off” korxonalar tashkil etish imkoniyati yaratilayotgani, ushbu korxonalarda professor-o‘qituvchilar, talabalar va izlanuvchilarning faol ishtiroki ta’minlanishi, investorlarni jalb qilish, venchur moliyalashtirish hamda reinvestitsiya mexanizmlarining kengaytirilishi alohida qayd etildi. Shuningdek, ilmiy ishlanmalar asosida yaratilgan mahsulotlar uchun soliq imtiyozlari joriy etilishi va tajriba-sinov ishlari xarajatlarining bir qismini davlat tomonidan qoplab berish tartibi yo‘lga qo‘yilishi belgilandi.

Uchrashuvda, shuningdek, oliy ta’lim tizimini transformatsiya qilishga qaratilgan ustuvor yo‘nalishlar, jumladan “U10 – O‘zbekistonning ilg‘or universitetlari” dasturi doirasida yetakchi oliygohlarga milliy tadqiqot universiteti maqomini berish, ilmiy klasterlar tashkil etish, universitetlarni milliy reyting asosida rag‘batlantirish tizimini joriy etish, “Yangi O‘zbekiston stipendiyasi” dasturi orqali xorijiy talabalarni jalb etish hamda ta’lim yo‘nalishlari bo‘yicha grant ajratishda mehnat bozori ehtiyojlarini inobatga olish masalalari ko‘rib chiqildi.

Shu bilan birga, “Kelajakka qadam” dasturi doirasida bitiruvchilar bandligini ta’minlash, ularni tadbirkorlik faoliyatiga keng jalb etish va innovatsion loyihalarni qo‘llab-quvvatlash yuzasidan bildirilgan taklif va tashabbuslar muhokama qilindi.

Uchrashuv yakunida ilm-fan sohasi va oliy ta’limni transformatsiya qilish yo‘nalishidagi ustuvor vazifalar belgilab olindi.