19.03.2026

Assalomu alaykum, qadrli ustozlar, aziz talaba-yoshlar, fidoyi xodimlar hamda universitetimizning hurmatli hamkorlari!

Siz, azizlarni butun musulmon olamining eng ulug‘, eng qutlug‘ ayyomlaridan biri — Ramazon hayiti bilan chin qalbimdan samimiy muborakbod etaman.

Ramazon hayiti — bu ezgulik, mehr-oqibat, saxovat va shukronalik bayramidir. Bu muborak ayyom inson qalbini poklaydi, ko‘ngillarga nur, xonadonlarga fayzu baraka, jamiyat hayotiga esa mehr-muruvvat, bag‘rikenglik va hamjihatlik ruhini olib kiradi. Ayniqsa, milliy va ma’naviy qadriyatlarimizning ajralmas qismiga aylangan ushbu saodatli kunlarda yurtimizda o‘zaro hurmat-ehtirom, e’tibor va insonparvarlik fazilatlari yanada yuksak namoyon bo‘ladi.

Ilm-fan va ma’rifat maskani bo‘lgan Buxoro davlat universiteti jamoasi uchun ham bu ayyomning ma’naviy ahamiyati beqiyosdir. Zero, Ramazon hayiti yoshlar qalbida ezgulik, halollik, sabr-qanoat, vatanparvarlik va fidoyilik tuyg‘ularini mustahkamlash, ularni yuksak ma’naviyatli, keng dunyoqarashli va komil insonlar etib tarbiyalashda muhim o‘rin tutadi.

Bugungi kunda mamlakatimizda ta’lim tizimini yangi bosqichga olib chiqish, ilm-fan salohiyatini yuksaltirish, yoshlarni har tomonlama qo‘llab-quvvatlash borasida amalga oshirilayotgan keng ko‘lamli islohotlar o‘zining salmoqli natijalarini bermoqda. Bu ulkan e’tibor va yuksak ishonch siz, aziz yoshlarning zamonaviy bilim va mustahkam hayotiy pozitsiyaga ega, Vatan ravnaqiga daxldor, tashabbuskor va raqobatbardosh mutaxassislar bo‘lib kamol topishingizga xizmat qilmoqda.

Hurmatli jamoamiz a’zolari!

Sizlarning ta’lim-tarbiya, ilmiy izlanish, yosh avlodni barkamol inson etib voyaga yetkazish yo‘lidagi sharafli va mas’uliyatli mehnatingiz har qanday e’tirofga loyiqdir. Universitetimiz taraqqiyoti, uning nufuzi va salohiyati yuksalishida har biringizning munosib hissangiz borligini alohida ta’kidlashni istardim.

Mana shunday ulug‘ va fayzli kunlarda barchangizga mustahkam sog‘lik, xonadonlaringizga qut-baraka, oilalaringizga tinchlik-totuvlik, qalblaringizga xotirjamlik, hayotingizga quvonch va ulkan muvaffaqiyatlar tilayman.

Yurtimiz tinch, xalqimiz omon, osmonimiz musaffo bo‘lsin!

Yana bir bor sizlarni muborak Ramazon hayiti bilan samimiy tabriklayman.

Ramazon hayiti muborak bo‘lsin!

Hurmat bilan,
O'zLiDeP Buxoro viloyati Kengashi raisi, Xalq deputatlari viloyat Kengashi deputati, Xalq deputatlari viloyat Kengashining Mahalliy byudjet, tadbirkorlikni rivojlantirish va iqtisodiy islohotlar masalalari bo‘yicha doimiy komissiyasi raisi, Buxoro davlat universiteti rektori, iqtisodiyot fanlari doktori, professor

Obidjon Xamidov