Buxoro davlat universitetida “Buxoro yahudiylari: mintaqaning ijtimoiy-iqtisodiy va madaniy hayotida” mavzusidagi nufuzli xalqaro ilmiy-amaliy konferensiya bo'lib o'tdi.
Anjumanda AQShning O‘zbekistondagi Favqulodda va Muxtor elchisi Jonatan Xenik, Isroilning O‘zbekistondagi Favqulodda va Muxtor elchisi Gideon Lustig, shuningdek, AQSh, Isroil va Yevropadan tashrif buyurgan jamoat arboblari, olimlar va diplomatik korpus vakillari ishtirok etishdi. Konferensiya davomida dunyoning yetakchi ilmiy markazlari mutaxassislari, jumladan, Rafael Nektalov, Anatoliy Isxakov, Ezro Malakov va boshqa nufuzli olimlar Buxoro yahudiylarining ko‘p asrlik tarixi, madaniy merosi, musiqiy san’ati (Shashmaqom) va mintaqa iqtisodiyotidagi roli yuzasidan 20 dan ortiq ma’ruza qildilar.
Tadbir nafaqat ilmiy, balki amaliy natijalarga ham boy bo‘ldi. Konferensiya doirasida Buxoro viloyati turistik tashkilotlari, ishlab chiqarish korxonalari hamda Isroilning yetakchi kompaniyalari o‘rtasida o‘zaro hamkorlik memorandumlari imzolandi. Tashkil etilgan B2B formatidagi uchrashuvlarda turizm salohiyatini oshirish, servis standartlarini yaxshilash va investitsiyaviy loyihalarni amalga oshirish bo‘yicha aniq kelishuvlarga erishildi.
Anjuman doirasida namoyish etilgan konsert dasturi o‘zbek va Buxoro yahudiylari madaniyatining mushtarakligini yana bir bor isbotladi. Shashmaqom durdonalari va an’anaviy kuylar ijrosi xorijiy mehmonlarda katta taassurot qoldirdi. Mazkur xalqaro konferensiya O‘zbekistonning bag‘rikenglik tamoyillarini mustahkamlash, madaniy merosni asrash hamda xalqaro iqtisodiy-ijtimoiy aloqalarni yangi bosqichga olib chiqishda muhim qadam bo‘ldi.
