Buxoro davlat universitetida Silk Road Research Academy rahbari Dr. Azamat Akbarov ishtirokida “Universitetlar–2030: boshqaruv, innovatsiya va global transformatsiya” mavzusida seminar tashkil etildi. Unda universitet rahbar xodimlari ishtirok etdilar.
Seminar doirasida zamonaviy universitet boshqaruvi, strategik rivojlanish, raqamli transformatsiya hamda global ta’lim makonida raqobatbardoshlikni oshirish masalalari atroflicha muhokama qilindi. Xususan, xorijiy oliy ta’lim muassasalari tajribasi, kelajak universitetlari modeli, akademik erkinlik va samarali boshqaruv mexanizmlari yuzasidan muhim fikr-mulohazalar bildirildi.
Muloqot jarayonida akademik halollik (academic integrity) tizimini kuchaytirish, ilmiy etikani ta’lim jarayonining ajralmas qismiga aylantirish bo‘yicha tavsiyalar berildi. Shuningdek, xalqaro reyting tizimlarida, jumladan QS World University Rankings ko‘rsatkichlarini yaxshilash, ilmiy maqolalarni Scopus bazasida chop etish talablari, iqtiboslik indeksini oshirish strategiyalari hamda ilmiy faoliyat samaradorligini kuchaytirish yo‘llari tahlil qilindi.
Seminarda xorijiy talabalar uchun qulay akademik va ijtimoiy muhit yaratish, ingliz tilidagi ta’lim dasturlarini kengaytirish, mentorlik va moslashtiruvchi dasturlarni yo‘lga qo‘yish, xalqaro ofislar faoliyatini takomillashtirish masalalari ham muhokama markazida bo‘ldi. Chet tillarini puxta egallash, akademik mobililikni rivojlantirish, xalqaro grant va loyihalarda faol ishtirok etish zarurligi alohida ta’kidlandi.
Bundan tashqari, faol va innovator talaba yetishtirish maqsadida ta’lim, ilm-fan va ishlab chiqarish integratsiyasini kuchaytirish, startap loyihalarni qo‘llab-quvvatlash, grant va amaliy tadqiqotlarga keng jalb etish muhimligi qayd etildi.
Seminar yakunida Dr. Azamat Akbarovga mazmunli ma’ruza va amaliy tavsiyalari uchun minnatdorchilik bildirildi. Mazkur tadbir universitetning 2030-yilgacha bo‘lgan taraqqiyot strategiyasi doirasida boshqaruv samaradorligini oshirish, sifat menejmenti va halollik tamoyillarini mustahkamlash hamda xalqaro standartlarga mos rivojlanish yo‘lida muhim qadam bo‘ldi.
