Hurmatli universitet jamoasi, professor-o‘qituvchilar, xodimlar va talabalar!
Sizlarni kirib kelayotgan 2026-yil bilan muborakbod etaman. Yangi yil barchamiz uchun sog‘liq, xotirjamlik, oilaviy baxt va ulkan yutuqlar yili bo‘lsin.
Yakunlanayotgan 2025-yil Buxoro davlat universiteti tarixida alohida ahamiyatga ega bo‘ldi. Universitet 95 yillik yubileyini nishonladi va “Sifat, raqamlashtirish va xalqaro e’tirof” yili sifatida tarixga kirdi. Shu yil davomida universitetimizning barcha yo‘nalishlarida sezilarli yutuqlar qayd etildi.
Hozirgi kunda universitetda 8 fakultet, 34 kafedra faoliyat yuritib, 19 mingdan ortiq talabalar tahsil olmoqda. Ta’lim yo‘nalishlari yangilandi va IT, sun’iy intellekt, tarjimashunoslik, san’at kabi sohalarda 25 ta yangi mutaxassislik joriy etildi. Professor-o‘qituvchilarning ilmiy salohiyati 66% ga oshirildi, jamoaga xorijiy va yosh iste’dodli mutaxassislar jalb qilindi.
Universitetimizda ta’lim jarayoni xalqaro standartlar asosida tashkil etilib, 28 ta akademik guruhda darslar to‘liq ingliz tilida olib borilmoqda. Shuningdek, 16 ta ta’lim yo‘nalishi ACQUIN tomonidan xalqaro akkreditatsiyadan o‘tkazildi, bu BuxDU diplomining xalqaro maydondagi nufuzini mustahkamladi.
2025-yilda universitetimiz “Smart University” modelini to‘liq joriy etdi. O‘quv va boshqaruv jarayonining 86% raqamlashtirildi, robototexnika klasteri va sun’iy intellekt laboratoriyalari tashkil etildi. Talabalar uchun zamonaviy sharoit yaratish maqsadida Face-ID tizimi va keng Wi-Fi tarmog‘i yo‘lga qo‘yildi.
Yil yakunida universitet jamoasi xalqaro maydonda ham tarixiy yutuqqa erishdi. Iordaniyaning Amman shahrida bo‘lib o‘tgan ELO xalqaro ingliz tili olimpiadasida BuxDU jamoasi SUPER KUBOKni qo‘lga kiritdi.
Shuningdek, universitet sportchilari xalqaro va Osiyo chempionatlari hamda respublika musobaqalarida yuzlab medallarni qo‘lga kiritdi. Futbol jamoasi “Pro-Liga” yo‘llanmasini oldi, voleybol jamoasi esa mamlakat chempioni bo‘ldi.
Universitetimiz ravnaqi yo‘lida fidokorona mehnat qilayotgan barcha jamoaga minnatdorlik bildiraman. Kirib kelayotgan Yangi yil barchamiz uchun yangi marralar, yuksak natijalar va barqaror taraqqiyot yili bo‘lsin!
Yangi yil muborak bo‘lsin!
Hurmat bilan,
Obidjon Xamidov
Buxoro davlat universiteti rektori, iqtisodiyot fanlari doktori, professor
