BuxDU Xalqaro hamkorlik bo‘yicha prorektor A.Jo‘rayev o‘z xizmat safari doirasida Turkiyaning Anqara universiteti rahbariyati bilan uchrashdi. Turkiyaning eng nufuzli oliy ta’lim muassasalaridan biri hisoblanuvchi mazkur universitet QS-2026 reytingida 697-o‘rin, U.S. News reytingida 802-o‘rinda turadi.
Universitet rektori prof. Nejdet Unuvar bilan uchrashuvda Buxoro davlat universiteti bilan kelgusi hamkorlik imkoniyatlari muhokama qilindi. Shu jumladan:
- BuxDU tomonidan xalqaro miqyosidagi nashrlarda yuqori natijalarga 10 nafar yetakchi olimning ma’lumotlari Anqara universitetiga taqdim etiladi. Anqara universitetidan tegishli fan sohalarida yetakchi olimlar bilan ilmiy guruhlar shakllantiriladi hamda hammualliflikda ilmiy maqolalar nashr ettiriladi.
- 2025-yilda birinchisi Toshkentda tashkil etilgan muhandislik va ijtimoiy fanlar simpoziumining ikkinchisi Anqara shahrida o‘tkazilishi rejalashtirilgan bo‘lib, Anqara universiteti rahbariyati tomonidan xalqaro simpoziumning uchunchisini Buxoro davlat universitetida tashkil qilish taklifi bildirildi. Ushbu xalqaro ilmiy tadbirning Buxoroda o‘tkazilishi akademik va ilmiy turizmni yanada rivojlantirish hamda Buxoro shahriga ko‘p sonli olimlarni taklif qilish imkonini beradi.
- 2026-yilning ikkinchi yarmida Anqara universiteti va BuxDU hamkorligida dolzarb ilmiy mavzulardan birida xalqaro konferensiya tashkil etiladi hamda buning uchun Turkiya xalqaro rivojlanish agentligi (TIKA) grantlari jalb etiladi.
-Erasmus+ tanlovlarga qoʻshma loyihalar taqdim etiladi;
- Anqara universiteti rahbariyati tomonidan Orxun akademik almashinuv dasturi doirasida professor-o‘qituvchi va talaba almashinuvini yo‘lga qo‘yishga oid kelishuv imzolanishi taklif etildi.
Shu kuni prorektor A.Jo‘rayev Anqara ijtimoiy fanlar universiteti rahbariyati bilan uchrashdi. Mazkur universitet asosan ijtimoiy fanlarga ixtisoslashgan bo‘lib, BuxDU bilan hamkor ta’lim muassasalaridan biri hisoblanadi.
Universitet huzurida texnopark maqomidagi “Sotsiokent” ijtimoiy innovatsiyalar parki mavjud bo‘lib, unda joylashgan 39 ta start-ap asosan ijtimoiy mavzulardagi innovatsiyalarni joriy qilish bilan shug‘ullanadi. Masalan, start-aplar tomonidan “Energetika tizimlarini ta’mirlashda virtual yo‘riqnoma”, “Psixologik yordamga muhtoj shaxslar uchun virtual maslahatchi” kabi innovatsion ishlanmalar yaratilgan.
Innovatsiyalar parkining tashkiliy modeli o‘ziga xos bo‘lib, Ozarbayjonning Boku davlat universitetida ham ushbu modeldan foydalanish bo‘yicha ish olib borilmoqda. Anqara ijtimoiy bilimlar universiteti rektori Prof. Musa Arijan bilan uchrashuvda ushbu model bo‘yicha 2026-yilda BuxDU bazasida respublika miqyosida OTMlar uchun seminar-trening tashkil qilish taklifi bildirildi.
21-noyabr kuni prorektor A.Jo‘rayev xizmat safari doirasida o‘zi tahsil olgan Anqara universiteti Siyosiy bilimlar fakultetiga tashrif buyurdi. Fakultet dekani Prof. Orhan Chelik bilan uchrashuvda jamiyat boshqaruvi, xalqaro munosabatlar, iqtisodiyot, menejment, mintaqaviy iqtisodiyot kabi sohalarda ilmiy-uslubiy hamkorlik qilish, ushbu sohalarda O‘zbekiston OTMlari uchun malaka oshirish kurslarini tashkil qilish bo‘yicha dastlabki kelishuvlarga erishildi.
Shuningdek, Anqara universiteti huquq fakulteti professor-o‘qituvchilari bilan uchrashuvda ular tomonidan O‘zbekistonning Butunjahon Savdo Tashkilotiga a’zoligiga qabul qilinishiga qisqa muddat qolganligi ta’kidlanib, BuxDU huqushunoslik yo‘nalishi talabalari uchun O‘zbekistonning 1991-yildan beri WIPO (Butunjahon intellektual mulk tashkiloti) a’zosi sifatida, shuningdek kutilayotgan BST a’zoligi doirasida mualliflik huquqi va patentlar sohasida seminar-treninglar tashkil etish taklifi bildirildi.
