16-noyabr — Xalqaro bag‘rikenglik kuni munosabati bilan Buxoro davlat universitetida mazkur sana keng nishonlandi. Shu munosabat bilan universitet bosh foyesida “Yangi O‘zbekiston — bag‘rikeng diyor!” nomli ko‘rgazma va bayram konsert dasturi tashkil etildi. Ko‘rgazmada turli millat va elatlarning madaniyati, an’analari va turmush tarzini aks ettiruvchi eksponatlar, xalq amaliy san’ati namunalar, fotosuratlar hamda adabiyotlar namoyish etildi. Tadbir orqali yoshlarda bag‘rikenglik, insonparvarlik, millatlararo totuvlik g‘oyalarini chuqur singdirish maqsad qilindi.
Bayram konsert dasturini Buxoro davlat universiteti Yoshlar masalalari va ma’naviy-ma’rifiy ishlar bo‘yicha birinchi prorektori D.Sh. Yavmutov ochib berdi. O‘z so‘zida u bag‘rikenglik va do‘stlik qadriyatlarining yoshlar ongida mustahkam o‘rnashishi jamiyat taraqqiyotining muhim omillaridan biri ekanini ta’kidladi.
Shuningdek, Buxoro viloyat kengashi huzuridagi Nodavlat notijorat tashkilotlari jamoat fondi boshlig‘i Komilov Zarif Zokirovich so‘zga chiqib, barchani bayram bilan tabrikladi hamda millatlararo totuvlik va insoniy qadriyatlarga hurmatni yanada mustahkamlash zarurligini qayd etdi.
Tadbir davomida Buxoro viloyat filarmoniyasi, “Buxoro mavjlari” ansambli hamda turk, tojik, tatar, boshqird va koreys milliy madaniyat markazlari vakillari ishtirokida turli millatlarga xos kuy-qo‘shiqlar, raqslar va sahna chiqishlari namoyish etildi. “Shodiyona”, “Inson qadri”, “Sabzak”, “Hindcha raqs”, “Buchaechum”, “Mashallah”, “Xalqlar va Millatlar do‘stligi” kabi chiqishlar tomoshabinlarga bayramona ruh ulashdi.
Tadbir davomida Yangi O‘zbekiston siyosatining asosi bo‘lgan tinchlik, totuvlik va bag‘rikenglik qadriyatlari keng targ‘ib etildi hamda barcha ishtirokchilarga unutilmas taassurotlar bag‘ishlandi.
