Buxoro davlat universitetida “Ma’rifat ulashib” loyihasi doirasida taniqli ijodkorlar — Toshpo‘lat Tugalov, Shermurod Subhon va Muhayyo Mirsaidovalar tashrif buyurishdi.
Mehmonlar BuxDU faoliyati bilan yaqindan tanishib, universitetning Office registrator markazi bilan tanishdilar. Shuningdek, Buxoro davlat universiteti jamoasining yutuqlari, ilmiy-amaliy ishlari aks etgan ko‘rgazmani ko‘zdan kechirishdi. Tashrif davomida mehmonlar BuxDUning ilm-fan, ta’lim va ma’naviyat sohalarida erishayotgan yutuqlarini yuksak baholab, o‘zaro hamkorlik va tajriba almashish borasida iliq fikrlar bildirishdi.
Tadbirni Buxoro davlat universiteti o‘quv ishlari bo‘yicha prorektori R. Jumayev ochib berdi. O‘z nutqida u ilm-fan, ma’naviyat va madaniyatning jamiyat hayotidagi o‘rni, yoshlar tafakkurini shakllantirish va intellektual salohiyatni yuksaltirishdagi ahamiyati haqida so‘z yuritdi. Shundan so‘ng adib Toshpo‘lat Tugalov yoshlar bilan samimiy muloqot olib borib, yoshlarning chet tillarni puxta o‘rganishi, tarix va madaniyatni chuqur bilishi, milliy o‘zlikni asrash zarurligini ta’kidladi. Muhayyo Mirsaidova so‘zga chiqib, kitobxonlik madaniyatini yuksaltirish, o‘qish orqali tafakkurni boyitish va ma’naviy o‘sishga erishishning ahamiyatini alohida qayd etdi. Shermurod Subhon esa o‘z nutqida xalqaro aloqalarni mustahkamlash, til bilish imkoniyatlari va global madaniy tafakkur haqida so‘z yuritdi. Ma’naviyatga boy, iliq ruhda o‘tgan ushbu uchrashuv talabalarda katta taassurot qoldirib, ularni o‘qishga, izlanishga va ijodga ilhomlantirdi.
