Bolgariyaning “Sv. Kliment Oxridskiy” nomidagi Sofiya universitetida “Sharq va G‘arb: ilmiy bilimlar sinergiyasi” mavzusidagi xalqaro ilmiy konferensiya bo'lib o'tmoqda. Mazkur nufuzli ilmiy anjuman Sofiya universiteti (Bolgariya), Samarqand davlat universiteti va Buxoro davlat universiteti hamkorligida tashkil etilgan bo‘lib, unda Sharq va G‘arb mamlakatlari olimlari, tadqiqotchilar hamda ta’lim sohasi vakillari ishtirok etmoqda.
Konferensiyaning birinchi sessiyasida Buxoro davlat universiteti rektori, iqtisodiyot fanlari doktori, professor Obidjon Xamidov “Educational Bridges Between East and West: The MA Double Degree Programme of Sofia University and Bukhara State University as a Model of Scientific Synergy” mavzusidagi ma’ruzasi bilan ishtirok etdi. Ma’ruzada BuxDU va Sofiya universiteti o‘rtasida yo‘lga qo‘yilgan qo‘shma magistratura dasturi ta’lim va ilm-fan sohasidagi xalqaro hamkorlikning samarali modeli sifatida e’tirof etildi. Tadbir davomida tomonlar o‘zaro tajriba almashish, ilmiy hamkorlikni kengaytirish va yangi qo‘shma ta’lim dasturlarini yo‘lga qo‘yish bo‘yicha kelishuvlarga erishdilar.
