Buxoro davlat universitetiga Fransiya Respublikasining yaqinda o‘z vazifasini bajarishga kirishgan Favqulodda va Muxtor elchisi Ualid Fuk tashrif buyurdi. Uchrashuvda BuxDU rektori Obidjon Xamidov boshchiligidagi rahbariyat, Buxoro davlat pedagogika instituti rektori Baxodir Ma’murov hamda Buxoro viloyati Turizm boshqarmasi boshlig‘i Suxrobjon Bobokalonov ishtirok etdilar.
Elchi BuxDU talabalari bilan samimiy muloqot o‘tkazib, universitetdagi sharoit va imkoniyatlar bilan yaqindan tanishdi. Shuningdek, universitet qoshida tashkil etilgan VATEL kafesi faoliyati bilan tanishib, Buxoro davlat universiteti va Fransiyaning Vatel xalqaro mehmonxona va turizm biznesi oliy maktabi hamkorligida yo‘lga qo‘yilgan qo‘shma ta’lim dasturlari asosida tahsil olayotgan talabalar bilan uchrashdi.
Tashrif davomida, fransuz tili kurslari va “Alliance française” markazi faoliyatini yo‘lga qo‘yish, talabalarni ushbu kurslarga jalb etish, shuningdek, BuxDU talabalari va yosh olimlarini Fransiyaga ilmiy stajirovkalarga yuborish masalalari ham muhokama qilindi.
Fransiya elchisi, o‘z navbatida, BuxDUning salohiyatini yuqori baholab, ta’lim va turizm sohalarini rivojlantirish, ilmiy hamkorlikni kuchaytirish, hamda O‘zbekiston ta’lim tizimiga Fransiya tajribasini joriy etish imkoniyatlari mavjudligini qayd etdi. Mazkur tashrif ikki davlat o‘rtasidagi hamkorlikni mustahkamlashda muhim qadamlardan biri bo‘ldi.
