1-oktabr – “Ustoz va murabbiylar kuni” munosabati bilan Buxoro shahridagi “Sherbudin” to‘yxonasida keng qamrovli bayram tadbiri bo‘lib o‘tdi. Bayram dasturxoni va madaniy-musiqiy chiqishlarga boy tadbir uchun tayyorgarlik ishlari BuxDU kasaba uyushmasi qo‘mitasi raisi B.Qobilov tomonidan amalga oshirildi.
Tadbirni Buxoro davlat universiteti rektori, professor Obidjon Xamidov ochib berib, barcha ustoz va murabbiylarni samimiy qutladi. U o‘z nutqida ta’lim-tarbiya, ilm-fan va yosh avlod kamoloti yo‘lida fidokorona mehnat qilayotgan ustozlarning xizmatlarini yuksak qadrlashini ta’kidladi. Shuningdek, BuxDU professori, “Shuhrat” medali sovrindori Muxtor Amonov ham so‘zga chiqib, bayram ishtirokchilariga ezgu tilaklar bildirdi. Tadbir davomida universitetning iqtidorli talabalari va ijodiy jamoalari tomonidan kuy-qo‘shiqlar, raqslar va sahna ko‘rinishlari taqdim etilib, barchaga ko‘tarinki kayfiyat ulashildi.
Bayramning tantanali qismida uzoq yillar ta’lim va tarbiya sohasida fidokorona mehnat qilgan faxriy ustozlar, shuningdek bugungi kunda samarali faoliyat yuritayotgan professor-o‘qituvchilar faxriy yorliqlar va esdalik sovg‘alari bilan taqdirlandilar. Jumladan, bir qator pedagoglar “Oliy ta’lim a’lochisi” ko‘krak nishoni, “Buxoro davlat universitetining 95-yilligi” ko‘krak nishoni va faxriy yorliqlar bilan mukofotlandilar.
Shuningdek, yoshlarga o‘z bilimini, tajribasini berib kelayotgan fidoyi ustozlarga universitet rahbariyati tomonidan samimiy minnatdorlik bildirildi. Taqdirlash marosimi ustoz va murabbiylarga bo‘lgan yuksak ehtirom va hurmatning yorqin ifodasi bo‘ldi.
